យេរ៉ូសាឡឹម៖ អ៊ីស្រាអែលឲ្យដឹងថា ដំណាក់កាល “ខ្លាំង” នៃសង្រ្គាមរបស់ខ្លួនលើក្រុមហាម៉ាស នៅភាគខាងត្បូងហ្គាហ្សានឹងបញ្ចប់ “ក្នុងពេលឆាប់ៗនេះ” ខណៈពេលដែលការកើនឡើង នៃអំពើហិង្សានៅតំបន់ វេសបែង បានធ្វើឱ្យប្រជាជនប៉ាឡេស្ទីន ជាច្រើននាក់បានស្លាប់។
រដ្ឋមន្ត្រីការពារជាតិអ៊ីស្រាអែល លោក Yoav Gallant បានឲ្យដឹងនៅក្នុងសន្និសីទសារព័ត៌មានថា យោធាបានបញ្ចប់ “ដំណាក់កាលធ្វើសមយុទ្ធដ៏ខ្លាំងក្លា នៅតំបន់ហ្គាហ្សាស្ទ្រីបភាគខាងជើង”។ លោកបានបន្ថែមទៀតថា នៅក្នុងតំបន់ភាគខាងត្បូង ដំណាក់កាលដែលពឹងផ្អែកខ្លាំង ត្រូវបានគេរំពឹងថានឹងបញ្ចប់ក្នុងពេលឆាប់ៗ។
យោងតាមលោក Gallant សង្គ្រាមដែលកំពុងបន្តរបស់អ៊ីស្រាអែល ប្រឆាំងនឹងក្រុមហាម៉ាស ដែលបានចាប់ផ្តើមបន្ទាប់ពីការ វាយប្រហារដ៏គួរឱ្យភ្ញាក់ផ្អើល របស់ពួកហាម៉ាសកាលពីថ្ងៃទី៧ ខែតុលា នឹងត្រូវបានបញ្ចប់នៅពេលដែល “លែងមានការគំរាមកំហែង ផ្នែកយោធាពីតំបន់ហ្គាហ្សា” ហើយនៅពេលដែល ក្រុមហាម៉ាស មិនអាចគ្រប់គ្រង និងបំពេញមុខងារជា កម្លាំងយោធានៅតំបន់ហ្គាហ្សា។
លោក Gallant បានលើកឡើងថា បន្ទាប់ពីសង្គ្រាមបានបញ្ចប់ ប៉ាឡេស្ទីន នឹងគ្រប់គ្រងតំបន់ហ្គាហ្សា។ លោកបានបន្ដថា “ប្រជាជនប៉ាឡេស្ទីន រស់នៅក្នុងតំបន់ហ្គាហ្សា ដូច្នេះហើយប្រជាជនប៉ាឡេស្ទីន នឹងគ្រប់គ្រងវានៅពេលអនាគត។ រដ្ឋាភិបាលហ្គាហ្សានាពេលអនាគតត្រូវតែរីកដុះដាលចេញពីតំបន់ហ្គាហ្សាស្ទ្រីប”។
លោកបានបន្ថែមថា តំបន់ហ្គាហ្សា នឹងត្រូវបានគ្រប់គ្រងដោយរដ្ឋាភិបាល នាពេលអនាគតដែលនឹងក្លាយជា “ជម្រើសស៊ីវិលដែលយកចិត្តទុកដាក់ ចំពោះសុខុមាលភាពរបស់អ្នករស់នៅហ្គាហ្សា” ហើយមិនមែនជាអរិភាព ចំពោះអ៊ីស្រាអែលឡើយ។ លោកបានទទូចថា កងកម្លាំងអ៊ីស្រាអែលនឹងមានសេរីភាព ក្នុងការប្រតិបត្តិការនៅក្នុងរង្វង់ការពារពលរដ្ឋអ៊ីស្រាអែល។
ស្របពេលជាមួយគ្នានេះ នៅទីក្រុងហ្គាហ្សា យ៉ាងហោចណាស់មនុស្សរាប់សិបនាក់ ត្រូវបានសម្លាប់ដោយគ្រាប់ផ្លោងរថក្រោះ នេះបើយោងតាមក្រសួងសុខាភិបាល ដែលមានមូលដ្ឋាននៅហ្គាហ្សា៕
ប្រែសម្រួល ឈូក បូរ៉ា
