ទាហានណាតូ ៩០.០០០ នាក់ បង្ហាញសាច់ដុំយោធាដាក់រុស្ស៊ី ដោយចូលរួមក្នុង សមយុទ្ធដ៏ធំបំផុត ចាប់តាំងពីសង្គ្រាមត្រជាក់

បរទេស ៖ អង្គការណាតូ បានចាប់ផ្តើមសមយុទ្ធយោធាដ៏ធំបំផុត របស់ខ្លួនចាប់តាំងពីសង្គ្រាមត្រជាក់ក្នុងសប្តាហ៍នេះ ជាមួយនឹងកងទ័ពរាប់ម៉ឺននាក់ នឹងធ្វើដំណើរឆ្លងកាត់ទ្វីបអឺរ៉ុប ក្នុងការបង្ហាញកម្លាំង ដែលមានន័យថា ជាការព្រមានដល់ប្រទេសរុស្ស៊ី បន្ទាប់ពីការលុកលុយពេញ លក្ខណៈទៅលើប្រទេស អ៊ុយក្រែន។

យោងតាមសារព័ត៌មាន VOA ចេញផ្សាយនៅថ្ងៃទី២៦ ខែមករា ឆ្នាំ២០២៤ បានឱ្យដឹងថា ប្រតិបត្តិការ Steadfast Defender 24 នឹងឃើញបុគ្គលិក យោធាណាតូប្រហែល ៩០.០០០ នាក់ ចូលរួមក្នុងសមយុទ្ធជាច្រើន នៅទូទាំងទ្វីបអឺរ៉ុបក្នុងប៉ុន្មានខែខាងមុខនេះ។ នាវាកងទ័ពជើងទឹកចំនួន ៥០ គ្រឿង, យន្តហោះ ៨០ គ្រឿង និងរថយន្តប្រយុទ្ធជាង ១.០០០ គ្រឿងត្រូវបានចូលរួម។

សម្ពន្ធមិត្តដែលមាន ៣១ប្រទេស បាននិយាយថា សមយុទ្ធនេះនឹងបង្ហាញថា ណាតូអាចធ្វើ និងទ្រទ្រង់ប្រតិបត្តិការ ពហុដែន ដ៏ស្មុគស្មាញក្នុងរយៈពេល ជាច្រើនខែ ឆ្លងកាត់រាប់ពាន់គីឡូម៉ែត្រ ពីខ្ពង់រាបភាគខាងជើង ដល់តំបន់ទំនាបកណ្តាលនៅអឺរ៉ុប និងអឺរ៉ុបខាងកើត និងក្នុងលក្ខខណ្ឌណាមួយ៕
ប្រែសម្រួលៈ ណៃ តុលា