ប៉េកាំង ៖ នាយករដ្ឋមន្ត្រីចិន លោក លី ឈាំង បានឲ្យដឹងថា ការពិតបានបង្ហាញឱ្យឃើញយ៉ាងពេញលេញថា ការពង្រឹងកិច្ចសហប្រតិបត្តិការរវាងចិន និងអង់គ្លេស មិនត្រឹមតែបម្រើផលប្រយោជន៍ជាមូលដ្ឋាននៃភាគីទាំងពីរប៉ុណ្ណោះទេ ប៉ុន្តែថែមទាំងរួមចំណែកដល់សន្តិភាព និងវិបុលភាពពិភពលោកផងដែរ។
លោក លី បានធ្វើការកត់សម្គាល់នៅ ក្នុងសារអបអរសាទរមួយទៅកាន់ “Icebreakers” ការប្រារព្ធពិធីបុណ្យចូលឆ្នាំចិន ឆ្នាំ២០២៤ ដែលរៀបចំដោយក្លឹប 48 Group របស់ចក្រភពអង់គ្លេស ។
លោក លី បានលើកឡើងថា អស់រយៈពេលជាយូរមកហើយ ក្លឹប 48 Group បានជំរុញយ៉ាងសកម្ម នូវការផ្លាស់ប្តូរសេដ្ឋកិច្ច និងពាណិជ្ជកម្ម ក៏ដូចជាការផ្លាស់ប្តូររវាងប្រជាជន និងប្រជាជនរវាងប្រទេសចិន និងចក្រភពអង់គ្លេស ដែលបានលើកកម្ពស់ ផលប្រយោជន៍ទៅវិញទៅមក និងលទ្ធផលឈ្នះ-ឈ្នះ និងការយល់ដឹងគ្នាទៅវិញ ទៅមកកាន់តែស៊ីជម្រៅ ។
លោកបានបន្ថែមថា ការបរិច្ចាគ ជាប្រវត្តិសាស្ត្រ ដែលធ្វើដោយមិត្តភ័ក្តិអង់គ្លេសជំនាន់ចាស់ នឹងត្រូវចងចាំជានិច្ច នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
លោកសង្ឃឹមថា ប្រជាជនដែលមានទស្សនៈវិស័យ មកពីគ្រប់មជ្ឈដ្ឋានក្នុងប្រទេសចិន និងអង់គ្លេសនឹងបន្តអនុវត្ត “ស្មារតីបំបែកទឹកកក” បន្តធ្វើសកម្មភាពយ៉ាងសកម្ម និងខ្លាំងក្លា ហើយចូលរួមចំណែកថ្មី ក្នុងការពង្រឹងទំនាក់ទំនងមិត្តភាព រវាងប្រជាជនទាំងពីរ លើកកម្ពស់ទ្វេភាគី។ កិច្ចសហប្រតិបត្តិការមិត្តភាព និងការសម្រេចបាននូវផលប្រយោជន៍ទៅវិញទៅមក និងលទ្ធផលឈ្នះ-ឈ្នះនៅកម្រិតខ្ពស់៕
ប្រែសម្រួល ឈូក បូរ៉ា
