បរទេស៖ យោងតាមការចេញផ្សាយរបស់ RT ប្រធានាធិបតីរុស្ស៊ី លោក Vladimir Putin បានសន្ទនាតាមទូរស័ព្ទកាលពីថ្ងៃព្រហស្បតិ៍ ជាមួយសមភាគីចិន លោក Xi Jinping នៅមុនថ្ងៃបុណ្យចូលឆ្នាំថ្មី ភាគីទាំងពីរបានរាយការណ៍ ខណៈដែលមហាយក្សអាស៊ីនេះបច្ចុប្បន្ន កំពុងប្រារព្ធថ្ងៃឈប់សម្រាកចាប់ពីថ្ងៃសៅរ៍។
វិមានក្រឹមឡាំងបានចេញ សេចក្តីថ្លែងការណ៍មួយដោយនិយាយថា មេដឹកនាំទាំងពីរបានប្រើ ឱកាសដើម្បីវាយតម្លៃអត្ថប្រយោជន៍នៃ កិច្ចសហប្រតិបត្តិការគ្រប់ជ្រុងជ្រោយ រវាងប្រទេសរបស់ពួកគេ ។
សេចក្តីថ្លែងការណ៍បានបន្ថែមថា លោក Putin និង Xi បានរំលឹកឡើងវិញនូវការប្តេជ្ញាចិត្តរបស់ពួកគេ ក្នុងការធ្វើការរួមគ្នានៅវេទិកានានា រួមទាំងអង្គការសហប្រជាជាតិ BRICS និងអង្គការសហប្រតិបត្តិការសៀងហៃ ព្រមទាំងបានចែករំលែកមតិ របស់ពួកគេលើបញ្ហាអន្តរជាតិ ជាពិសេសជម្លោះមជ្ឈិមបូព៌ាផងដែរ។
មេដឹកនាំចិនក៏បានធ្វើការសាទរ ចំពោះការកាន់តំណែងជាប្រធានាធិបតី បច្ចុប្បន្នរបស់រុស្ស៊ីនៃក្រុម BRICS ដែលជាក្រុមមហាអំណាចសេដ្ឋកិច្ច មិនមែនលោកខាងលិចដែលទើបបានស្វាគមន៍សមាជិកថ្មីចំនួន ៥ប្រទេសក្តីហើយ លោកបានសន្យាគាំទ្រក្រុងប៉េកាំង ចំពោះកម្មវិធីរបស់ក្រុងមូស្គូ ខណៈដែលនឹងបន្តប្តេជ្ញាចិត្ត ជួយដល់ក្រុមប្រទេសនេះដូចគ្នា៕
ប្រែសម្រួល៖ ស៊ុន លី
