ម៊ុយនិក៖ រដ្ឋមន្ត្រីការបរទេសចិន លោក វ៉ាង យី បានឲ្យដឹងថា ប្រទេសចិន នឹងបន្តដើរតួនាទីស្ថាបនា ក្នុងការបញ្ចប់ជម្លោះនៅដំណាក់កាលដំបូង និងការស្ដារឡើងវិញនូវសន្តិភាព ក្នុងប្រទេសអ៊ុយក្រែន ហើយនឹងមិនបោះបង់ចោលឡើយ ។
លោក វ៉ាង យី ដែលជាសមាជិកការិយាល័យ នយោបាយនៃគណៈកម្មាធិការ មជ្ឈិមបក្សកុម្មុយនិស្តចិន បានធ្វើការកត់សម្គាល់នៅពេលជួប ជាមួយរដ្ឋមន្ត្រីការបរទេសអ៊ុយក្រែនលោក Dmytro Kuleba នៅខាងក្រៅសន្និសីទសន្តិសុខទីក្រុងម៊ុយនិក ដែលកំពុងតែប្រព្រឹត្តទៅ។
ដោយកត់សម្គាល់ថា ប្រទេសចិន និងអ៊ុយក្រែនឈានដល់ភាព ជាដៃគូយុទ្ធសាស្ត្រជាច្រើនឆ្នាំកន្លងមក ហើយប្រជាជនទាំងពីរមាន ទំនាក់ទំនងមិត្តភាពជាប្រពៃណី លោក វ៉ាង យី បានឲ្យដឹងថា ទោះបីជាស្ថានភាពអន្តរជាតិ ផ្លាស់ប្តូរយ៉ាងណាក៏ដោយ ប្រទេសចិន សង្ឃឹមថាទំនាក់ទំនងជាមួយអ៊ុយក្រែន នឹងអភិវឌ្ឍជាធម្មតា និងបន្តផ្តល់ផលប្រយោជន៍ដល់ប្រជាជនទាំងពីរ។
លោកបានថ្លែងអំណរគុណជាថ្មីម្តងទៀត ចំពោះភាគីអ៊ុយក្រែន ដែលបានជួយបុគ្គលិកចិនជម្លៀស ដោយសុវត្ថិភាពក្នុងគ្រាអាសន្ន ដោយលោកបាននិយាយថាប្រជាជនចិន នឹងមិនភ្លេចឡើយ។
លោកបានពន្យល់យ៉ាងលម្អិត អំពីជំហររបស់ចិនចំពោះបញ្ហាអ៊ុយក្រែន ដោយសង្កត់ធ្ងន់ថា ចិនប្រកាន់ខ្ជាប់នូវការដោះស្រាយ នយោបាយនៃបញ្ហាចំណុចក្តៅ និងជំរុញការចរចាសន្តិភាព ហើយមិនញញើតភ្លើង ចំណេញពីស្ថានការណ៍ ឬលក់អាវុធដ៍សាហាវដល់តំបន់ និងភាគីពាក់ព័ន្ធក្នុងជម្លោះឡើយ។
ចំណែកឯលោក Kuleba បានឲ្យដឹងថា អ៊ុយក្រែនមានឆន្ទៈក្នុងការរក្សា ការផ្លាស់ប្តូរមិត្តភាពជាមួយប្រទេសចិន និងជំរុញឱ្យមានការអភិវឌ្ឍបន្ថែមទៀត នៃទំនាក់ទំនងទ្វេភាគីរបស់ពួកគេ៕
ប្រែសម្រួល ឈូក បូរ៉ា
