បរទេស៖ ឧបនាយករដ្ឋមន្ត្រី និងជារដ្ឋមន្ត្រី ក្រសួងពាណិជ្ជកម្មរបស់ថៃ លោក ភុំថាម វិឆាយ៉ាឆៃ បានច្រានចោលពាក្យ ចចាមអារ៉ាមដែលថា អតីតនាយករដ្ឋមន្ត្រីគឺលោក ថាក់ស៊ីន ស៊ីណាវ៉ាត្រា នឹងចាប់ផ្តើមមានឥទ្ធិពលលើរដ្ឋបាលបច្ចុប្បន្ន ដែលពេលនេះលោកត្រូវ បានដោះលែងឲ្យនៅក្រៅឃុំ ។
យោងតាមសារព័ត៌មាន The Nation របស់ថៃ ចេញផ្សាយកាលពីថ្ងៃទី១៩ ខែកុម្ភៈ ឆ្នាំ២០២៤ បានឱ្យដឹងថា លោក ភុំថាម បាននិយាយកាលពីថ្ងៃចន្ទថា អ្នកដែលមានការព្រួយបារម្ភបែបនេះគឺជាអ្នកដែលគ្មានទស្សនៈវិស័យវែងឆ្ងាយ ។
លោកថាក់ស៊ីន ដែលបានបង្កើតគណបក្សថៃរ៉ាក់ថៃ ដែលទីបំផុតបានក្លាយ ជាគណបក្សភឿថៃ ត្រូវបានគេជឿថា បញ្ជាឱ្យមានការគោរព ពីសមាជិកស្នូលជាច្រើន នៃគណបក្សកាន់អំណាច រួមទាំងលោក ភុំថាម ផងដែរ។
លោក ភុំថាម គឺជាដៃស្តាំរបស់លោកថាក់ស៊ីន ក្នុងអំឡុងពេលកាន់តំណែង ទាំងពីររបស់លោក។
លោក ថាក់ស៊ីន បានត្រឡប់ទៅភូមិគ្រឹះរបស់លោកវិញ កាលពីថ្ងៃអាទិត្យបន្ទាប់ពីត្រូវបានឃុំខ្លួននៅមន្ទីរពេទ្យប៉ូលិសទូទៅរយៈពេល ១៨០ ថ្ងៃ ក្រោយពីលោកបានត្រឡប់ពីការនិរទេសខ្លួនឯងរយៈពេល ១៥ ឆ្នាំ។
នៅពេលសួរថា តើគាត់នឹងទៅសួរសុខ ទុក្ខអតីតនាយករដ្ឋមន្ត្រីឬអត់? លោក ភុំថាម បាននិយាយថា វាគ្រាន់តែជារឿងធម្មតា សម្រាប់អ្នកដែលគោរពលោកថាក់ស៊ីន ស្វែងរកឱកាសមកសួរ សុខទុក្ខគាត់ ជាពិសេសចាប់តាំងពីគាត់ បានឃ្លាតឆ្ងាយ ពីស្រុកទេសអស់រយៈពេលជាច្រើនឆ្នាំមកនេះ។
លោកថា “ខ្ញុំចង់ទៅលេងគាត់ ព្រោះខ្ញុំស្រលាញ់ និងគោរពគាត់។ ខ្ញុំធ្លាប់ធ្វើការជាមួយគាត់ច្រើនឆ្នាំមកហើយ ប៉ុន្តែដំបូងខ្ញុំត្រូវតែទុកពេលឱ្យគាត់នៅជាមួយក្រុមគ្រួសារ… ពេលខ្ញុំមានឱកាស ខ្ញុំនឹងទៅលេងគាត់»។
នៅពេលសួរទៀតថា តើលោកថាក់ស៊ីន នឹងជួយបក្សភឿថៃ ឬអត់នោះ? លោក ភុំថាម បាននិយាយថា គណបក្សនេះមានភាពរឹងមាំរួចហើយនិងប្តេជ្ញាចិត្ត ក្នុងការថែរក្សាប្រជាជន ៕
ប្រែសម្រួលៈ ណៃ តុលា
