ប្រេស៊ីល៖ រដ្ឋាភិបាលប្រេស៊ីលនៅថ្ងៃចន្ទម្សិលមិញនេះ បានហៅឯកអគ្គរដ្ឋទូតរបស់ខ្លួននៅទីក្រុង Tel Aviv លោក Frederico Meyer ត្រឡប់ទៅប្រទេសវិញ ដើម្បីធ្វើការពិគ្រោះយោបល់ បន្ទាប់ពីប្រធានាធិបតី Luiz Inacio Lula da Silva បានសម្តែងការរិះគន់យ៉ាងចាស់ដៃ ចំពោះការវាយប្រហាររបស់អ៊ីស្រាអែលលើតំបន់ហ្គាហ្សាស្រ្ទីប ជាការឆ្លើយតបទៅនឹង ក្រសួងការបរទេសប្រេស៊ីលបានបញ្ជាក់ថា ការដែលអ៊ីស្រាអែល កោះហៅអ្នកការទូតមកធ្វើសេចក្តីថ្លែងការណ៍។
ក្រសួងបានឲ្យដឹងនៅក្នុងសេចក្តីថ្លែងការណ៍មួយថា រដ្ឋមន្ត្រីការបរទេសលោក Mauro Vieira ក៏បានកោះហៅឯកអគ្គរដ្ឋទូតអ៊ីស្រាអែលប្រចាំប្រទេសប្រេស៊ីល លោក Daniel Zonshine ផងដែរ។
លោក Lula da Silva កាលពីថ្ងៃអាទិត្យបានចោទប្រកាន់អ៊ីស្រាអែលថា បានប្រព្រឹត្ត “អំពើប្រល័យពូជសាសន៍” ប្រឆាំងនឹងជនស៊ីវិលប៉ាឡេស្ទីន ដែលរស់នៅក្នុងតំបន់ហ្គាហ្សាស្ទ្រីប។
កាលពីខែមករា ប្រទេសប្រេស៊ីល បានចូលរួមជាមួយអាហ្វ្រិកខាងត្បូងក្នុងការនាំយកសំណុំរឿងប្រល័យពូជសាសន៍ប្រឆាំងនឹងអ៊ីស្រាអែល នៅតុលាការយុត្តិធម៌អន្តរជាតិ។
កាលពីសប្តាហ៍មុន ក្នុងអំឡុងពេលដំណើរកម្សាន្តទៅកាន់ទ្វីបអាហ្រ្វិក លោក Lula da Silva បានប្រកាសថា ប្រទេសប្រេស៊ីល នឹងធ្វើការរួមចំណែកថ្មីដល់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា (UNRWA)៕ ប្រែសម្រួល ឈូក បូរ៉ា
