បរទេស៖ យ៉ាងហោចណាស់មនុស្ស ៥ នាក់ បានស្លាប់ និង៣ នាក់ផ្សេងទៀតបានរងរបួស បន្ទាប់ពីកប៉ាល់ដឹកជញ្ជូនមួយគ្រឿង បានបុកជាមួយស្ពាននៅភាគខាងត្បូងប្រទេសចិន កាលពីព្រឹកថ្ងៃព្រហស្បតិ៍ ដោយបានបំផ្លាញផ្នែកខ្លះនៃផ្លូវ និងធ្វើឱ្យរថយន្តធ្លាក់ចូលទៅក្នុងទឹក។
យោងតាមសារព័ត៌មាន VOA ចេញផ្សាយនៅថ្ងៃទី២២ ខែកុម្ភៈ ឆ្នាំ២០២៤ បានឱ្យដឹងថា កប៉ាល់នោះបានបុកស្ពាន Lixinsha នៅម៉ោងប្រហែល ៥:៣៩ ព្រឹក ។ បើយោងតាមអាជ្ញាធរ ដែលបាននិយាយថាឧបទ្ទវហេតុនេះគឺបណ្តាលមកពី “ប្រតិបត្តិការមិនត្រឹមត្រូវរបស់នាវិក” ។ ប្រព័ន្ធផ្សព្វផ្សាយចិនបានផ្សាយថា ម្ចាស់កប៉ាល់ត្រូវបានចាប់ខ្លួន តាំងពីពេលនោះមក។
ម៉ូតូអគ្គីសនី១គ្រឿង, រថយន្តធុនតូច៣គ្រឿង និងរថយន្តក្រុង១គ្រឿងធ្លាក់ពីលើស្ពាន ។ មន្ត្រីក្រុងបាននិយាយក្នុងសន្និសីទសារព័ត៌មានថា អ្នកបើករថយន្តក្រុង និងម៉ូតូ ព្រមទាំងមនុស្សបីនាក់ដែលជិះក្នុងរថយន្តបានស្លាប់។
យោងតាមរដ្ឋបាលសុវត្ថិភាព ដែនសមុទ្រក្វាងចូវបានឲ្យដឹងថា នៅពេលកប៉ាល់បានបុកស្ពាន គឺកប៉ាល់ពុងធ្វើដំណើរពីហ្វូសានទៅក្វាងចូវ។
យោងតាមទូរទស្សន៍រដ្ឋចិន CCTV បានឱ្យដឹងថា ការបាក់ស្ពានដែលឆ្លងកាត់ផ្លូវទឹក Hongqili បានកាត់ផ្តាច់ការ ផ្គត់ផ្គង់ទឹក និងយានជំនិះចូលទៅ កាន់កោះមួយ ដែលមានមនុស្សរស់នៅប្រហែល ៨០០០ នាក់៕
ប្រែសម្រួលៈ ណៃ តុលា
