បរទេស៖ រដ្ឋមន្ត្រីការបរទេសស្លូវ៉ាគីលោក Juraj Blanar បានឲ្យដឹងថា ប្រទេសរបស់លោកប្រឆាំងនឹងការដាក់ទណ្ឌកម្មលើប្រទេសរុស្ស៊ី ហើយនឹងមិនបញ្ជូនអាវុធ ឬកងទ័ពណាមួយទៅអ៊ុយក្រែនដើម្បីពង្រីកជម្លោះនោះទេ។
លោកបានប្រាប់អ្នកយកព័ត៌មានបន្ទាប់ពីកិច្ចប្រជុំជាមួយសមភាគីរុស្ស៊ីលោក Sergey Lavrov នៅខាងក្រៅវេទិកាការទូត Antalya ដែលធ្វើឡើងនៅទីក្រុងភាគខាងត្បូងតួកគីថា “ទណ្ឌកម្មធ្វើឱ្យប៉ះពាល់ដល់សហភាពអឺរ៉ុបច្រើនជាងសេដ្ឋកិច្ចរុស្ស៊ី” ។
លោកបានកត់សម្គាល់ថា “យើងនឹងមិនគាំទ្រទណ្ឌកម្មផ្សេងទៀតដែលនឹងធ្វើឲ្យប៉ះពាល់ដល់ស្លូវ៉ាគីជាងរុស្ស៊ីនោះទេ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក Blanar បានលើកឡើងថា “ក្នុងនាមជារដ្ឋាភិបាលថ្មីរបស់ស្លូវ៉ាគី យើងនឹងមិនប្រគល់អាវុធណាមួយពីឃ្លាំងរបស់កងកម្លាំងស្លូវ៉ាគីទៅអ៊ុយក្រែននោះទេ” ដោយកត់សម្គាល់ថា រដ្ឋាភិបាលរបស់លោក បានបញ្ឈប់ការបញ្ជូនកញ្ចប់អាវុធ ដែលមានតម្លៃប្រហែល ៤០លានអឺរ៉ូទៅអ៊ុយក្រែន។
លោកបានប្រាប់អ្នកយកព័ត៌មានថា “ជំហររបស់យើងឥឡូវនេះកាន់តែច្បាស់ជាងពេលមុន ដោយសារព្រំដែនមិនផ្លាស់ទី ហើយយើងកំពុងអំពាវនាវឱ្យមានបទឈប់បាញ់ និងដំណើរការចរចាសន្តិភាព ដែលជាដំណោះស្រាយតែមួយគត់នៃវិបត្តិនេះ”៕ ប្រែសម្រួល ឈូក បូរ៉ា
