បរទេស៖ ខ្សែកាបជាង ៦.០០០ម៉ែត្រ ដែលភ្ជាប់កាមេរ៉ាឃ្លាំមើល ដែលដាក់នៅក្រោមស្ពាន ក្នុងទីក្រុងហូជីមិញ ត្រូវបានចោរលួច ដែលបណ្តាល ឱ្យមានការខាតបង់ជាប្រាក់ ចំនួន ៣០០ លានដុង ស្មើនឹងប្រហែល ១២.១៥០ ដុល្លារអាមេរិក និងប៉ះពាល់ដល់ចរាចរណ៍ផ្លូវទឹក។
យោងតាមសារព័ត៌មាន VN Express ចេញផ្សាយនៅថ្ងៃទី៥ ខែមីនា ឆ្នាំ២០២៤ បានឱ្យដឹងថា ចោរហាក់ដូចជាចូលចិត្តខ្សែភ្លើង ខ្សែស្ពាន់ និងខ្សែសំណាញ់ប្លាស្ទិក HDPE , នេះបើយោងតាមឯកសារដែលផ្ញើ ដោយមជ្ឈមណ្ឌលគ្រប់គ្រងហេដ្ឋារចនាសម្ព័ន្ធ ចរាចរណ៍ផ្លូវគោក ទៅកាន់អង្គភាពនានាដូចជា រដ្ឋបាលក្រុង Thu Duc និង Binh Chanh និង Can Gio ។ កាមេរ៉ាត្រូវបានដំឡើងនៅក្រោមស្ពាន គឺដើម្បីតាមដានចរាចរណ៍ផ្លូវទឹក ។
ខ្សែស្ពាន់ទទេប្រវែង ៣.៧០០ ម៉ែត្រ, ខ្សែភ្លើង DSTS ប្រវែង ១.៦០០ ម៉ែត្រ និងខ្សែកាបប្រភេទ Duplex CV ប្រវែង ៨៨០ ម៉ែត្រ ត្រូវបានបាត់បង់។
ខ្សែកាបត្រូវបានគេបិទកាវ ដើម្បីការពារចោរកម្ម ប៉ុន្តែវាមិនបានរារាំងចោរឡើយ ។ ជាមួយនឹងកាមេរ៉ា ដែលរងផលប៉ះពាល់ដោយការលួចនោះ បទប្បញ្ញត្តិ នៃចរាចរណ៍ទូក និងការស៊ើបអង្កេតការបុកគ្នា ជាមួយទូកផ្សេងទៀត និងបង្គោលស្ពានត្រូវបានប៉ះពាល់។
ស្ពានជាច្រើនដែលមានអំពើចោរកម្ម កើតឡើងគឺនៅផ្លូវទឹកសំខាន់ ហើយមានចរាចរណ៍ច្រើនឆ្លង កាត់ជារៀងរាល់ថ្ងៃ៕
ប្រែសម្រួលៈ ណៃ តុលា
