អង់ការ៉ា៖ ប្រធានាធិបតីទួរគីលោក Recep Tayyip Erdogan បានឲ្យដឹងថា តួកគី បានត្រៀមខ្លួនរួចជាស្រេច ក្នុងការទទួលបន្ទុករបស់ខ្លួន នៅក្នុងក្របខ័ណ្ឌនៃយន្តការធានា ដែលជាផ្នែកនៃកិច្ចខិតខំប្រឹងប្រែងរបស់ខ្លួន ដើម្បីបញ្ចប់ជម្លោះរវាងអ៊ីស្រាអែល និងក្រុមហាម៉ាស។
លោក Erdogan បានឲ្យដឹងនៅក្នុងសន្និសិទសារព័ត៌មានរួមមួយ ដែលមានការចូលរួមដោយ លោកប្រធានាធិបតីប៉ាឡេស្ទីនលោក ម៉ាម៉ូដ អាបាស នៅរដ្ឋធានីអង់ការ៉ាថា “វាច្បាស់ណាស់ថាសន្តិភាព ត្រឹមត្រូវជាមួយនឹងការធានា គឺត្រូវការជាជាងការខិតខំប្រឹងប្រែង សន្តិភាពដោយពាក្យសម្ដី” ។
លោកបានបន្ថែមថា ផ្លូវតែមួយគត់ ដើម្បីសន្តិភាពយូរអង្វែង គឺការបង្កើតរដ្ឋប៉ាឡេស្ទីនឯករាជ្យ អធិបតេយ្យភាព និងសមាហរណកម្មភូមិសាស្រ្តមួយ នៅលើព្រំដែនឆ្នាំ១៩៦៧ ជាមួយក្រុងហ្សេរុយសាឡឹមខាងកើត ជារដ្ឋធានីរបស់ខ្លួន។
លោកបានបន្តថា “ឥឡូវនេះត្រូវបានគេទទួលស្គាល់ យ៉ាងទូលំទូលាយថា លុះត្រាតែមានដំណោះស្រាយដោយយុត្តិធម៌ ចំពោះបញ្ហាអ៊ីស្រាអែលនិងប៉ាឡេស្ទីននោះសន្តិភាពមិនអាចឈ្នះបាននៅមជ្ឈិមបូព៌ាឡើយ”។
លោកបានសន្មតថា “អាកប្បកិរិយាខូច និងគ្មានច្បាប់ទម្លាប់” របស់អ៊ីស្រាអែល ចំពោះការគាំទ្រដែលខ្លួនទទួលបាន ពីមហាអំណាចលោកខាងលិច” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកបន្ថែមទៀតថា តួកគីឈរក្នុងសាមគ្គីភាព ជាមួយប្រជាជនប៉ាឡេស្ទីន លោកបានបន្ថែមថា រដ្ឋាភិបាលទួរគីបានទទួលអ្នកជំងឺជាង ៩០០នាក់ពីតំបន់ហ្គាហ្សាស្រ្ទីប សម្រាប់ការព្យាបាល ហើយលោក ក៏បានគូសបញ្ជាក់ពីកិច្ចខិតខំប្រឹងប្រែង របស់ប្រទេសរបស់លោកក្នុងការកសាង មន្ទីរពេទ្យនៅក្នុងទីវាលមួយមួយកន្លែង នៅហ្គាហ្សាផងដែរ ៕
ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)