ប្រទេសបារាំង បង្កើនកម្រិតប្រកាសអាសន្ន អំពើភេរវកម្ម នៅទូទាំងប្រទេស បន្ទាប់ពីមានការវាយប្រហារ លើកន្លែងតន្ត្រីក្នុងប្រទេសរុស្ស៊ី បណ្តាលឲ្យមនុស្ស ១៣៧ នាក់ស្លាប់

បរទេស ៖ ប្រទេសបារាំង បានបង្កើនកម្រិតប្រកាសអាសន្ន អំពើភេរវកម្មនៅទូទាំងប្រទេស បន្ទាប់ពីមានការវាយប្រហារ លើកន្លែងតន្ត្រីដ៏ចង្អៀតមួយ ក្នុងប្រទេសរុស្ស៊ី ដែលបានបណ្តាលឲ្យមនុស្ស ១៣៧ នាក់ស្លាប់។

យោងតាមសារព័ត៌មាន RT ចេញផ្សាយនៅថ្ងៃទី២៥ ខែមីនា ឆ្នាំ២០២៤ បានឱ្យដឹងថា កាលពីថ្ងៃសុក្រ ជនជាតិ ភាគតិច Tajik បួននាក់បានបើកការ បាញ់ប្រហារនៅខាងក្នុងសាលប្រគុំតន្រ្តី Crocus នៅខាងក្រៅទីក្រុងមូស្គូ ហើយបានដុតបំផ្លាញ អគារនោះថែមទៀត។ ភេរវករទាំងអស់ក្រោយមក ត្រូវបានឃុំខ្លួន ខណៈដែលពួកគេព្យាយាមរត់ភៀសខ្លួន តាមរថយន្តទៅកាន់ប្រទេសអ៊ុយក្រែន នេះបើយោង តាមប្រធានាធិបតី រុស្ស៊ី លោក Vladimir Putin ។

ក្រុមឧទ្ទាម ជីហាដរដ្ឋអ៊ីស្លាមខេត្ត Khorasan (ISIS-K) បានអះអាងទទួលខុសត្រូវចំពោះការវាយប្រហារនេះ។ មកទល់ពេលនេះ ទីក្រុងម៉ូស្គូ មិនទាន់បានបញ្ជាក់ពីការ ចូលរួមរបស់ក្រុមនេះទេ។

នាយករដ្ឋមន្ត្រីបារាំង លោក Gabriel Attal បានសរសេរនៅលើ X (អតីត Twitter) កាលពីថ្ងៃអាទិត្យថា “បន្ទាប់ពីការវាយប្រហារនៅទីក្រុងម៉ូស្គូ ប្រធានាធិបតីបារាំងបាន កោះប្រជុំក្រុមប្រឹក្សាការពារជាតិ និងសន្តិសុខនៅល្ងាចនេះ” ។ នាយករដ្ឋមន្ត្រីបានបន្ថែមថា “ដោយមើលឃើញពីការអះអាង របស់ក្រុមរដ្ឋឥស្លាមថា ក្រុមនេះជាអ្នកទទួលខុសត្រូវ ចំពោះការវាយប្រហារ និងការគំរាមកំហែង ដែលកំពុងកើតមាននៅក្នុងប្រទេសរបស់យើង យើងបានសម្រេចចិត្តដំឡើងផែនការ Vigipirate ដល់កម្រិតខ្ពស់បំផុត” ។

ប្រទេសបារាំង បានកំពុងរស់នៅក្រោមវិធានការសន្តិសុខ ដែលបានពង្រឹងចាប់តាំងពីមានការវាយប្រហារ ភេរវកម្មជាបន្តបន្ទាប់ក្នុងខែមករា ឆ្នាំ ២០១៥ នៅពេលដែលក្រុមអ៊ីស្លាម បានសម្លាប់មនុស្ស ១៧ នាក់នៅក្នុងទីក្រុងប៉ារីស និងជាយក្រុងប៉ារីស ។ រដ្ឋាភិបាលបានឆ្លើយតបដោយការអនុម័តប្រតិបត្តិការ Sentinel ដែលមើលឃើញ ពីការដាក់ពង្រាយទាហានប្រដាប់អាវុធដើម្បីល្បាតរដ្ឋធានីបារាំង។

ការវាយប្រហារដ៏សាហាវបំផុតមួយ របស់ពួកអ៊ិស្លាមនៅក្នុង ការចងចាំនាពេលថ្មីៗនេះបានកើតឡើងនៅក្នុងខែវិច្ឆិកា ឆ្នាំ២០១៥ នៅពេលដែលអ្នកបំផ្ទុះគ្រាប់បែកអត្តឃាត និងខ្មាន់កាំភ្លើង បានសម្លាប់មនុស្ស ១៣០ នាក់នៅក្នុងទីក្រុងប៉ារីស៕
ប្រែសម្រួលៈ ណៃ តុលា