តូក្យូ៖ ប្រភពការទូត បានឲ្យដឹងថា យោធាអាមេរិកគ្រោងនឹងពង្រឹងមុខងារ នៃទីបញ្ជាការរបស់ខ្លួន នៅក្នុងប្រទេសជប៉ុន ព្រោះវាមានបំណង សម្រាប់កិច្ចសហប្រតិបត្តិការ កាន់តែរលូនជាមួយកងកម្លាំងស្វ័យការពារ របស់ប្រទេសអាស៊ីក្នុងការដោះស្រាយ ការគំរាមកំហែងផ្នែកសន្តិសុខ ដែលបង្កឡើងដោយប្រទេសចិន និងកូរ៉េខាងជើង ។
ប្រភពបានឲ្យដឹងថា ប្រទេសជប៉ុន និងសហរដ្ឋអាមេរិកត្រូវបានគេរំពឹងថា នឹងយល់ព្រមលើការពិនិត្យឡើងវិញនៃប្រតិបត្តិការបញ្ជា និងការគ្រប់គ្រងរបស់ពួកគេ នៅពេលដែលនាយករដ្ឋមន្ត្រីលោក ហ្វូមីអូ គីស៊ីដា និងប្រធានាធិបតីអាមេរិកលោក ចូ បៃដិន ជួបពិភាក្សាគ្នានៅទីក្រុងវ៉ាស៊ីនតោនក្នុងខែមេសា ដោយបន្ថែមថាវានឹងត្រូវបានបញ្ចូលក្នុងសេចក្តីថ្លែងការណ៍រួមមួយ។
ប្រភពបានឲ្យដឹងថា ទីក្រុងតូក្យូ និងវ៉ាស៊ីនតោន ទំនងជានឹងពិភាក្សាលម្អិត អំពីបញ្ហាបែបនេះ មុនពេលកិច្ចពិភាក្សាពីរបូកពីរ ដែលពាក់ព័ន្ធនឹងរដ្ឋមន្ត្រីការពារជាតិ និងរដ្ឋមន្ត្រីការបរទេសរបស់ពួកគេ ដែលនឹងធ្វើឡើងនៅចុងឆ្នាំនេះ។
ការផ្លាស់ប្តូរនេះកើតឡើងនៅពេល ដែលប្រទេសជប៉ុន និងសហរដ្ឋអាមេរិក បានពង្រឹងទំនាក់ទំនងការពារជាតិ របស់ពួកគេជាមួយនឹងបរិយាកាសសន្តិសុខ នៅក្នុងតំបន់អាស៊ី ដែលមិនស្ថិតស្ថេរ ចំពេលមានការអះអាងរបស់ចិន ចំពោះតៃវ៉ាន់ និងការអភិវឌ្ឍអាវុធនុយក្លេអ៊ែរ ជាបន្តបន្ទាប់របស់កូរ៉េខាងជើង។
ប្រទេសជប៉ុន និងសហរដ្ឋអាមេរិក ក៏នឹងធ្វើការលើជំហានបន្ថែមទៀត ដើម្បីបង្កើនសមត្ថភាពឆ្លើយតបរបស់ពួកគេ។ ទីក្រុងតូក្យូ បានសម្រេចចិត្តនៅឆ្នាំ២០២២ ដើម្បីទទួលបាន សមត្ថភាពក្នុងការវាយលុក មូលដ្ឋានសត្រូវសូម្បីតែនៅក្រោមរដ្ឋធម្មនុញ្ញ ដែលបោះបង់ចោលសង្រ្គាម របស់ប្រទេសជប៉ុន ៕
ប្រែសម្រួល ឈូក បូរ៉ា
