ស្លាប់មនុស្ស៥នាក់ និងបាត់ខ្លួន៥នាក់ ក្នុងហេតុការណ៍គ្រោះ បាក់ដីមួយកើតឡើង នៅខេត្តជ្វាខាងលិច ប្រទេសឥណ្ឌូនេស៊ី

ហ្សាការតា ៖ ក្រុមអ្នកជួយសង្គ្រោះបានរកឃើញ សាកសពចំនួន៥នាក់ ក្នុងនោះបូករួមទាំងកុមារផងដែរ ដែលបានកប់នៅក្នុង ពេលមានគ្រោះបាក់ដីកើតឡើង ដែលបានវាយប្រហារ មកលើភូមិចំនួន២ក្នុងខេត្ត ជ្វាខាងលិច (West Java) របស់ឥណ្ឌូនេស៊ី កាលពីពេលថ្មីៗនេះ ។

គួរបញ្ជាក់ថា សាកសពទី៥ ត្រូវបានរកឃើញនៅព្រឹកថ្ងៃពុធនេះ នៅក្បែរទន្លេមួយ ចម្ងាយប្រហែល២០គីឡូម៉ែត្រ ពីទីតាំងដែលគេស្គាល់ចុងក្រោយរបស់ជនរងគ្រោះ មុនពេលគ្រោះមហន្តរាយ ។ នេះបើយោងតាមការលើកឡើងរបស់ Supriono ប្រធានផ្នែកប្រតិបត្តិការនៃការិយាល័យស្វែងរក និងជួយសង្គ្រោះប្រចាំខេត្តខាងលើបានបញ្ជាក់ដូច្នេះ ។

ក្រៅពីអ្នកស្លាប់ មនុស្ស៥នាក់ នៅបន្តបាត់ខ្លួននៅឡើយទេ ។

បើយោងតាមអាជ្ញាធរ មូលដ្ឋាន គ្រោះបាក់ដីបានបំផ្លាញផ្ទះប្រមាណ៣០ខ្នង និងកន្លែងគោរពបូជាសាសនា ចំនួន២កន្លែងផងដែរ ។

នៅថ្ងៃពុធនេះ ក្រុមអ្នកជួយសង្គ្រោះបានបន្តស្វែងរកអ្នកបាត់ខ្លួន នៅតំបន់ច្រាំងថ្មដែលចោទខ្លាំង ។

ប្រទេសឥណ្ឌូនេស៊ី បានជួបប្រទះនឹងគ្រោះបាក់ដី និងគ្រោះទឹកជំនន់ក្នុងរយៈពេលប៉ុន្មានខែថ្មីៗនេះនៃរដូវវស្សា ៕
ប្រែសម្រួលដោយ៖ ម៉ៅ បុប្ផាមករា