កង់បេរ៉ា៖ ប្រមុខនៃកងកម្លាំងការពារជាតិអូស្ត្រាលី (ADF) បានសុំទោសដល់អតីតយុទ្ធជន ចំពោះកង្វះប្រព័ន្ធគាំទ្រ និងការថែទាំ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការផ្តល់ភ័ស្តុតាងនៅថ្ងៃចុងក្រោយនៃសវនាការសាធារណៈ សម្រាប់គណៈកម្មការ Royal Commission into Defense and Veteran Suicide នៅថ្ងៃព្រហស្បតិ៍នេះ ប្រធាន ADF លោក Angus Campbell បានទទួលស្គាល់ការបរាជ័យក្នុងការគាំទ្រសមាជិកបច្ចុប្បន្ន និងអតីតយោធា។
លោកបានលើកឡើងថា “ប្រជាជនរបស់យើងសមនឹងទទួលបាន និងគួររំពឹងយ៉ាងត្រឹមត្រូវនូវការគាំទ្រ និងការថែទាំសុខុមាលភាព ដែលពួកគេត្រូវការទាំងអំឡុងពេល និងបន្ទាប់ពីការបម្រើរបស់ពួកគេ”។
“ខ្ញុំទទួលស្គាល់ថា វាមិនតែងតែជាករណីនេះទេ ហើយបាននាំឱ្យមានសោកនាដកម្ម ដល់ការស្លាប់ដោយការធ្វើអត្តឃាតរបស់មនុស្សមួយចំនួនរបស់យើង។ ខ្ញុំសូមអភ័យទោសដោយឥតលាក់លៀមចំពោះភាពខ្វះខាតទាំងនេះ”។
លោក Campbell បានកោតសរសើរ ចំពោះភាពក្លាហានរបស់មនុស្ស ដែលបានចេញមុខផ្តល់ភស្តុតាងដល់ការស៊ើបអង្កេត ហើយបានលើកឡើងថា ADF ប្តេជ្ញាធ្វើឱ្យកាន់តែប្រសើរឡើង៕
ប្រែសម្រួល ឈូក បូរ៉ា
