បរទេស ៖ យោងតាមការចេញ ផ្សាយរបស់ RT អ្នកនាំពាក្យក្រសួង ការពារជាតិចិន លោក Wu Qian បាននិយាយកាលពីថ្ងៃព្រហស្បតិ៍ថា ក្រុងប៉េកាំងបានថ្កោលទោស ការដាក់ពង្រាយកាំជ្រួចរយៈចម្ងាយ មធ្យម របស់ទីក្រុងវ៉ាស៊ីនតោន នៅក្នុងតំបន់ អាស៊ីប៉ាស៊ីហ្វិក ហើយនឹងចាត់វិធានការ ប្រកបដោយប្រសិទ្ធភាពទាំងអស់ ដើម្បីរារាំងសហរដ្ឋអាមេរិកពីការ រញ៉េរញ៉ៃ នៅសមុទ្រចិនខាងត្បូង។
ការអត្ថាធិប្បាយ របស់លោកធ្វើឡើង បន្ទាប់ពីសហរដ្ឋអាមេរិក បានចាប់ផ្តើមសមយុទ្ធរួមដ៏ធំបំផុត របស់ខ្លួនជាមួយហ្វីលីពីន ចាប់តាំងពីសង្គ្រាមត្រជាក់ នៅសមុទ្រចិន ខាងត្បូងកាលពីដើមសប្តាហ៍នេះ។
សមយុទ្ធនេះមានឈ្មោះថា Balikatan គ្រោងនឹងដំណើរការ រហូតដល់ថ្ងៃទី ១០ ខែឧសភា ហើយត្រូវបានគេនិយាយថាមានទាហានអាមេរិកជាង ១១០០០ នាក់ និងទាហានហ្វីលីពីន ៥០០០ នាក់ហើយក្នុងនោះក៏មាន ការចូលរួមពីសំណាក់ នាវាចម្បាំងបារាំង ក៏ដូចជាកងទ័ពមក ពីប្រទេសបារាំង និងអូស្ត្រាលី ផងដែរ ។
គួរឲ្យដឹងដែរថា កាលពីដើមខែនេះ សហរដ្ឋអាមេរិកក៏បានធ្វើសមយុទ្ធ រយៈពេលពីរ សប្តាហ៍ដាច់ដោយឡែកមួយ ជាមួយប្រទេសហ្វីលីពីនដែលមាន ឈ្មោះថា Salaknib 2024 ក្នុងអំឡុងពេល ដែលខ្លួនបានដាក់ពង្រាយកាំជ្រួច SM-6 ដែលមានសមត្ថភាពទៅដល់តៃវ៉ាន់ដែរ ៕
ប្រែសម្រួល៖ស៊ុនលី
