ប៉េកាំង៖ រដ្ឋមន្ត្រីការបរទេសអាមេរិកលោក Antony Blinken និងសមភាគីចិនលោក វ៉ាង យី បានចាប់ផ្តើមកិច្ចពិភាក្សានៅថ្ងៃសុក្រនេះនៅទីក្រុងប៉េកាំង ជាមួយនឹងរបៀបវារៈ ដែលរំពឹងថានឹងរួមបញ្ចូលការគាំទ្ររបស់ចិន សម្រាប់ឧស្សាហកម្មការពារជាតិរបស់រុស្ស៊ី ក៏ដូចជាភាពតានតឹងជុំវិញកោះតៃវ៉ាន់ និងសមុទ្រចិនខាងត្បូង។
លោក Blinken ដែលបានត្រលប់មកប្រទេសអាស៊ីវិញជាលើកដំបូងក្នុងរយៈពេល ១០ ខែ ក៏ទំនងជានឹងលើកឡើងពីការព្រួយបារម្ភរបស់សហរដ្ឋអាមេរិកអំពីភាពលើសចំណុះរបស់ទីក្រុងប៉េកាំងនៅក្នុងរថយន្តអគ្គិសនី និងឧស្សាហកម្មផ្សេងៗទៀត ហើយលោកអាចនឹងជួបជាមួយប្រធានាធិបតីចិនលោក ស៊ី ជីនពីង នៅថ្ងៃបន្ទាប់។
ដំណើរទស្សនកិច្ចរយៈពេលបីថ្ងៃរបស់លោកនៅប្រទេសចិន រហូតដល់ថ្ងៃសុក្រ គឺជាផ្នែកមួយនៃកិច្ចខិតខំប្រឹងប្រែងរបស់ប្រទេសទាំងពីរ ក្នុងការធ្វើឱ្យទំនាក់ទំនងមានស្ថិរភាព ទោះបីជាមានការខ្វែងគំនិតគ្នាលើបញ្ហាជាច្រើន ចំពេលមានការប្រជែងគ្នាកាន់តែខ្លាំង។
ដំណើរទស្សនកិច្ចនេះធ្វើឡើងបន្ទាប់ពីការធ្វើដំណើរទៅប្រទេសចិនរបស់រដ្ឋលេខាធិការរតនាគារលោកស្រី Janet Yellen នៅដើមខែនេះ បន្ទាប់ពីលោក ស៊ី និងប្រធានាធិបតីអាមេរិកលោក ចូ បៃដិន បានបញ្ជាក់ពីសារៈសំខាន់នៃការពង្រឹងកិច្ចសន្ទនាទ្វេភាគីកម្រិតខ្ពស់ ដើម្បីរក្សាស្ថិរភាពទំនាក់ទំនងក្នុងអំឡុងពេលកិច្ចពិភាក្សាតាមទូរស័ព្ទ។
រដ្ឋាភិបាលក្រុងវ៉ាស៊ីនតោន អះអាងថា ប្រទេសចិន បាននឹងកំពុងផ្ទេរទំនិញ និងគ្រឿងសព្វាវុធផ្សេងៗទៅកាន់ប្រទេសរុស្ស៊ី ដែលទីក្រុងមូស្គូ បានប្រើដើម្បីជួយដល់ការផលិតយោធារបស់ខ្លួន ចំពេលមានការឈ្លានពានរបស់អ៊ុយក្រែន។
នៅកោះតៃវ៉ាន់ មេដឹកនាំចូលកាន់តំណែងថ្មីលោក Lai Ching-te ដែលទីក្រុងប៉េកាំង បានថ្កោលទោសថាជាអ្នកតស៊ូមតិឯករាជ្យ នឹងចូលកាន់តំណែងនៅថ្ងៃទី២០ ខែឧសភា។ នៅដើមសប្តាហ៍នេះ សភាសហរដ្ឋអាមេរិកបានអនុម័តច្បាប់ ដើម្បីផ្តល់ការគាំទ្រផ្នែកហិរញ្ញវត្ថុសម្រាប់ឥណ្ឌូប៉ាស៊ីហ្វិក រួមទាំងទីក្រុងតៃប៉ិផងដែរ។ វាប្រឈមមុខនឹងសម្ពាធយោធាកើនឡើងពីទីក្រុងប៉េកាំង៕ប្រែសម្រួល ឈូក បូរ៉ា
