ហ្គាហ្សា៖ យន្តហោះចម្បាំងអ៊ីស្រាអែល បានទម្លាក់គ្រាប់បែកលើតំបន់ ជាច្រើននៅភាគខាងជើងតំបន់ហ្គាហ្សា កាលពីថ្ងៃអាទិត្យ ខណៈដែលការប៉ះទង្គិចគ្នាយ៉ាងខ្លាំងក្លា បានផ្ទុះឡើងរវាងចលនាតស៊ូអ៊ីស្លាមហាម៉ាស់ និងកងកម្លាំងអ៊ីស្រាអែល ដែលធ្វើប្រតិបត្តិការថ្មីនៅក្នុងតំបន់ទាំងនោះ។
ប្រភពសន្តិសុខប៉ាឡេស្ទីន បានប្រាប់កាសែតស៊ិនហួ ថាអ៊ីស្រាអែលបានធ្វើការវាយប្រហារតាមអាកាស និងកាំភ្លើងធំទៅលើអគារលំនៅដ្ឋាន និងដីកសិកម្មនៅក្នុងជំរុំជនភៀសខ្លួន Jabalia ទីក្រុង Jabalia នៅជិតទីក្រុង Beit Lahia និងសង្កាត់មួយចំនួនក្នុងទីក្រុងហ្គាហ្សា។
អ្នកនាំពាក្យការពារជនស៊ីវិលនៅតំបន់ហ្គាហ្សា លោក Mahmoud Basel បានឲ្យដឹងនៅក្នុងសេចក្តីថ្លែងការណ៍មួយថា កងកម្លាំងអ៊ីស្រាអែលបានបង្កើនការ វាយប្រហារទៅលើផ្ទះលំនៅដ្ឋានទាំងនោះ ដែលជនស៊ីវិលនៅតែនៅខាងក្នុង។
លោកបានលើកឡើងថា ជនរងគ្រោះត្រូវបានរាយការណ៍ពី Jabalia និងតំបន់ក្បែរនោះ ដែលជាគោលដៅដោយការ វាយប្រហាររបស់អ៊ីស្រាអែល ប៉ុន្តែ “វាពិបាកសម្រាប់ក្រុមរបស់យើង ក្នុងការចូលទៅដល់ពួកគេ” ។
ទន្ទឹមនឹងនេះដែរ រថក្រោះ និងរថយន្តយោធារបស់អ៊ីស្រាអែល បានចូលទៅជ្រៅពីជាយក្រុងភាគខាងកើត ដើម្បីឈានទៅវាយលុកថ្មី លើតំបន់ហ្គាហ្សាភាគខាងជើង នេះបើយោងតាមប្រភពពីប៉ាឡេស្ទីន ដែលមិនបញ្ចេញឈ្មោះ ៕
ប្រែសម្រួល ឈូក បូរ៉ា
