យេរ៉ូសាឡឹម៖ យោធាអ៊ីស្រាអែល បានប្រកាសកាលពីថ្ងៃអាទិត្យថា ខ្លួនបានបើកច្រកឆ្លងកាត់ថ្មីមួយ ដើម្បីនាំយកជំនួយមនុស្សធម៌ ទៅកាន់តំបន់ហ្គាហ្សាស្ទ្រីប ដែលរងគ្រោះដោយទុរ្ភិក្ស។
នៅក្នុងសេចក្តីប្រកាសព័ត៌មានមួយ យោធាបានប្រកាសពីការបើក “ច្រកព្រំដែន Erez ខាងលិច” រវាងអ៊ីស្រាអែល និងភាគខាងជើងតំបន់ហ្គាហ្សា ដោយមានការសម្របសម្រួល ជាមួយសហរដ្ឋអាមេរិក។
យោងតាមយោធា ការឆ្លងកាត់ថ្មីនេះស្ថិតនៅ ភាគខាងលិចនៃច្រក Erez ដែលខិតទៅជិតឆ្នេរសមុទ្រ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
ប្រភពបានបន្ថែមថា ផ្លូវឆ្លងកាត់ត្រូវបានសាងសង់ ដោយយោធាអ៊ីស្រាអែល “ជាផ្នែកមួយនៃកិច្ចខិតខំប្រឹងប្រែងដើម្បីបង្កើនផ្លូវ សម្រាប់ជំនួយទៅកាន់តំបន់ហ្គាហ្សា ជាពិសេសទៅភាគខាងជើងនៃតំបន់ហ្គាហ្សា” ។
កាលពីថ្ងៃអាទិត្យផងដែរ យោធាអ៊ីស្រាអែលបានឲ្យដឹងថា ខ្លួនបានចាប់ផ្តើមប្រតិបត្តិការ ទ្រង់ទ្រាយធំមួយនៅក្នុងតំបន់ Jabaliya ភាគខាងជើងហ្គាហ្សា ខណៈពេលដែលកំពុងបន្តប្រតិបត្តិការ របស់ខ្លួននៅភាគខាងកើត Rafah និងផ្នែកខ្លះនៃច្រកឆ្លងកាត់រ៉ាហ្វា របស់តំបន់ហ្គាហ្សា។
នៅក្នុងនោះដែរប្រភពបានសង្កត់ធ្ងន់ថា ខ្លួនបានអំពាវនាវដល់ប្រជាជន ស៊ីវិលឱ្យជម្លៀសចេញពី Jabaliya ទៅកាន់ទីជម្រកនៅ ភាគខាងលិចទីក្រុងហ្គាហ្សា៕
ប្រែសម្រួល ឈូក បូរ៉ា
