បរទេស៖យោងតាមការចេញផ្សាយរបស់ RT នាយករដ្ឋមន្រ្តី Ulf Kristersson បាននិយាយថា ប្រទេសស៊ុយអែតអាចមានសក្តានុពលអនុញ្ញាតឱ្យសហរដ្ឋអាមេរិកដាក់អាវុធនុយក្លេអ៊ែរនៅលើទឹកដីរបស់ខ្លួន ប៉ុន្តែប្រសិនបើ
ករណីដែលប្រទេសនេះត្រូវបានទាញចូលទៅក្នុងជម្លោះយោធាប៉ុណ្ណោះ។
នៅក្នុងបទសម្ភាសន៍ជាមួយវិទ្យុ Sveriges កាលពីថ្ងៃច័ន្ទ លោក Kristersson បានសង្កត់ធ្ងន់ថា ចាប់តាំងពីចូលរួមជាមួយអង្គការណាតូ រដ្ឋាភិបាលបានដាក់សំណើចំនួនពីរទៅកាន់សភា ដោយបញ្ជាក់ថា ទីក្រុង Stockholm
នឹងមិនធ្វើជាម្ចាស់ផ្ទះសម្រាប់កងទ័ពបរទេស ឬអាវុធនុយក្លេអ៊ែរជាអចិន្ត្រៃយ៍នៅក្នុងពេលសន្តិភាពឡើយ។
ទោះបីជាយ៉ាងណាក៏ដោយ លោកបាននិយាយថា ការហាមឃាត់បែបនេះនឹងត្រូវដកចេញ ប្រសិនបើស៊ុយអែត ដែលមិនមានសង្រ្គាមតាំងពីឆ្នាំ ១៨១៤នឹងក្លាយជាផ្នែកនៃជម្លោះយោធាសកម្មណាមួយនាពេលខាងមុខ។
នាយករដ្ឋមន្ត្រីបាននិយាយថា៖នៅក្នុងស្ថានភាពសង្រ្គាម វាគឺជាបញ្ហាខុសគ្នាទាំងស្រុង ដោយបន្ថែមថា សមាជិកទាំងអស់នៃអង្គការ NATO ទទួលបានអត្ថប្រយោជន៍ពីប្រព័ន្ធការពារជាអាវុធនុយក្លេអ៊ែរ ដែលត្រូវតែមាននៅក្នុងរដ្ឋប្រជាធិបតេយ្យ
ដរាបណារុស្ស៊ីនៅតែមានអាវុធនុយក្លេអ៊ែរនៅឡើយបែបនេះ។
បន្ថែមពីនេះដែរលោកKristersson ក៏បានសង្កត់ធ្ងន់ដែរថា វាអាស្រ័យលើប្រទេសស៊ុយអែតក្នុងការសម្រេចចិត្តថាអាវុធបរទេសណាបើមាននឹងត្រូវដាក់នៅលើទឹកដីខ្លួន៕
ប្រែសម្រួល៖ស៊ុនលី
