បរទេស ៖ តុលាការធម្មនុញ្ញ របស់ប្រទេសថៃ បានទទួលយកញត្តិ នៅក្នុងការប៉ុនប៉ងទម្លាក់លោក សេដ្ឋា ថាវីស៊ីន ជានាយករដ្ឋមន្ត្រីចេញពីតំណែង ជុំវិញការសម្រេចចិត្តរបស់លោក ក្នុងការតែងតាំងរដ្ឋមន្ត្រី ដែលមានកំណត់ត្រាជាប់ពន្ធនាគារ ។ ទោះជាយ៉ាងណា តុលាការបានបោះឆ្នោត ដោយសំឡេង ៥-៤ មិនឱ្យព្យួរលោកសេដ្ឋា ថាវីស៊ីន ពីកាតព្វកិច្ចនោះឡើយ ដោយរង់ចាំការសម្រេចរបស់ខ្លួនសិន។
យោងតាមសារព័ត៌មាន Bangkok Post ចេញផ្សាយ នៅថ្ងៃទី២៣ ខែឧសភា ឆ្នាំ២០២៤ បានឱ្យដឹងថា ចៅក្រមតុលាការធម្មនុញ្ញ ចំនួនប្រាំបួននាក់បានកោះប្រជុំ នៅព្រឹកថ្ងៃព្រហស្បតិ៍ ដើម្បីពិចារណាលើញត្តិ ដែលដាក់ដោយក្រុមសមាជិក ព្រឹទ្ធសភាចាំផ្ទះចំនួន ៤០នាក់។ តាមរយៈសំឡេង ៦ទល់នឹង៣ ចៅក្រមបានយល់ព្រមទទួលយកញត្តិនេះ ហើយបានបង្គាប់ឱ្យលោក សេដ្ឋា ថាវីស៊ីន ផ្តល់ការពន្យល់ក្នុងរយៈពេល ១៥ ថ្ងៃ។
តុលាការក៏បានបោះឆ្នោត ដោយសំឡេង ៨ទល់នឹង១ ដើម្បីច្រានចោលញត្តិស្រដៀងគ្នានេះប្រឆាំងនឹងអតីតរដ្ឋមន្ត្រីទីស្តីការនាយករដ្ឋមន្ត្រី លោក Pichit Chuenban ដោយលើកឡើងពីការលាលែង ពីតំណែងរបស់លោកកាលពីថ្ងៃអង្គារ។
កន្លងមក សមាជិកព្រឹទ្ធសភាចាំផ្ទះ ធ្លាប់បានស្នើទៅតុលាការធម្មនុញ្ញថា តើលោក សេដ្ឋា ថាវីស៊ីន និងលោក Pichit Chuenban គួរតែត្រូវបញ្ឈប់ ពីមុខតំណែងតាមមាត្រា ១៧០ (៤) និង (៥) នៃធម្មនុញ្ញដែលទាក់ទងនឹងក្រមសីលធម៌របស់គណៈរដ្ឋមន្ត្រីដែរឬទេ៕
ប្រែសម្រួលៈ ណៃ តុលា
