ក្រុមហ៊ុន Apple កំពុងប្រឈមមុខ នៅអាហ្វ្រិកកណ្តាល ពាក់ព័ន្ធបញ្ហា សារធាតុរ៉ែខុសច្បាប់

រដ្ឋអាហ្រ្វិក ៖ មេធាវីតំណាងឲ្យ DR Congo បាននិយាយកាលពីថ្ងៃពុធថា សាធារណរដ្ឋប្រជាធិបតេយ្យ កុងហ្គោ (DR Congo) កំពុងពិចារណាលើចំណាត់ការផ្លូវច្បាប់ ប្រឆាំងនឹងក្រុមហ៊ុន បច្ចេកវិទ្យាយក្ស របស់អាមេរិក Apple ប្រសិនបើខ្លួនខកខានក្នុងការ ឆ្លើយតបទៅនឹងសំណួរអំពីខ្សែសង្វាក់ផ្គត់ ផ្គង់រ៉ែរបស់ខ្លួននៅប្រទេសអាហ្វ្រិកកណ្តាល។

មេធាវីមកពីទីក្រុង Amsterdam & Partners LLP មានមូលដ្ឋាននៅទីក្រុងវ៉ាស៊ីនតោន និង Bourdon & Associes នៅទីក្រុងប៉ារីស បាននិយាយថា ពួកគេបានសរសេរ ទៅកាន់ក្រុមហ៊ុនមេរបស់ Apple និងក្រុមហ៊ុនបុត្រសម្ព័ន្ធ របស់បារាំងនៅថ្ងៃទី ២២ ខែមេសា ដើម្បីទាមទារចម្លើយអំពីថា តើក្រុមហ៊ុនកំពុងស្វែង រកប្រភពលោហៈសម្រាប់ផលិត ផលរបស់ខ្លួនពីតំបន់ជម្លោះនៅភាគខាងកើត DR Congo ។

ក្រុមអ្នកច្បាប់បានអះអាងក្នុង សេចក្តីថ្លែងការណ៍មួយថា កាលបរិច្ឆេទផុតកំណត់រយៈពេល ៣ សប្តាហ៍សម្រាប់ការឆ្លើយតប បានកន្លងផុតទៅហើយ ហើយក្រុមហ៊ុនបច្ចេកវិទ្យាយក្សបានរក្សាភាពស្ងៀមស្ងាត់ ហើយមិនបានឆ្លើយតប ឬសូម្បីតែទទួលស្គាល់ការទទួលសំណួរ ។

លោក William Bourdon មេធាវីម្នាក់ក្នុង ចំនោមមេធាវីបាននិយាយថា អវត្តមាននៃការឆ្លើយតបគឺជាការទទួល យកដោយចេតនាដែលសំណួរដែលយើងសួរ Apple គឺពាក់ព័ន្ធ ។ DR Congo គឺជាអ្នកផលិត cobalt ឈានមុខគេរបស់ពិភពលោក ជាសមាសធាតុសំខាន់ក្នុងថ្មប្រើគ្រឿងអេឡិចត្រូនិកភាគច្រើន រួមទាំងទូរសព្ទចល័ត និងរថយន្តអគ្គិសនី ។

ប្រទេសនេះត្រូវបានញាំញីដោយអំពើហិង្សា ជាច្រើនទស្សវត្ស ជាពិសេសនៅភាគខាង កើតមាន ទំនាក់ទំនងជាមួយ ក្រុមប្រដាប់ អាវុធរាប់សិបនាក់ រួមទាំងក្រុមសកម្មប្រយុទ្ធ M23 ដែលកំពុងប្រយុទ្ធជាមួយ រដ្ឋាភិបាលដើម្បីធនធាន។
នៅថ្ងៃទី ២៥ ខែមេសា ក្រុមហ៊ុន Amsterdam & Partners LLP បានចេញផ្សាយរបាយការណ៍មួយ អះអាងថា ក្រុមហ៊ុន និងក្រុមប្រដាប់អាវុធជាច្រើនកំពុងរត់ពន្ធរ៉ែដែលជីកយករ៉ែនៅអតីតអាណានិគមបែលហ្ស៊ិកចេញតាមរយៈប្រទេស Rwanda អ៊ូហ្គង់ដា និងប៊ូរុនឌី ជាកន្លែងដែលពួកគេត្រូវបានបោកគក់ និងបញ្ចូលទៅក្នុងខ្សែសង្វាក់ផ្គត់ផ្គង់ពិភពលោក ។

យោងតាមក្រុមហ៊ុនច្បាប់ថា ក្រុមហ៊ុនបច្ចេកវិទ្យាធំៗដូចជា Apple, Intel, Sony និង Motorola ត្រូវបានគេជូនដំណឹងថា លោហៈធាតុបានទិញពីប្រទេស Rwanda ត្រូវបានទិញពី DR Congo ក្នុងបរិបទនៃការកេងប្រវ័ញ្ចដោយហិង្សា។
Robert Amsterdam ជាដៃគូស្ថាបនិកនៃ Amsterdam & Partners LLP បានចោទប្រកាន់ក្រុមហ៊ុន Apple ពីការលក់បច្ចេកវិទ្យា ផលិតដោយសារធាតុរ៉ែ ដែលមានប្រភពមក ពីតំបន់ប្រជាជនកំពុង ត្រូវបានបំផ្លិចបំផ្លាញ ដោយការរំលោភសិទ្ធិមនុស្សធ្ងន់ធ្ងរ ៕
ដោយ៖លី ភីលីព