បរទេស ៖ យោងតាមការចេញ ផ្សាយរបស់ RT ឧបនាយករដ្ឋមន្ត្រីអ៊ីតាលីលោក Matteo Salvini បានហៅអគ្គលេខាធិការ អង្គការណាតូលោក Jens Stoltenberg ថាជា សុភាពបុរសដ៏គ្រោះថ្នាក់ម្នាក់ សម្រាប់សំណើរបស់គាត់ក្នុងការអនុញ្ញាត ឱ្យទីក្រុងគៀវវាយលុកគោលដៅក្នុងប្រទេសរុស្ស៊ី ដោយប្រើអាវុធរបស់លោកខាងលិច ដែលក្នុងនោះលោក Salvini ថែមទាំងបានព្រមានថា ទង្វើបែបនេះអាចឈានទៅដល់សង្គ្រាម លោកលើកទី៣ជាមិនខាន។
ប្រធានអង្គការ NATO បាននឹងកំពុងជំរុញ ឱ្យម្ចាស់ជំនួយលោកខាងលិច នៃអាវុធចម្ងាយឆ្ងាយ អនុញ្ញាតឱ្យមានការ វាយប្រហារ ប្រឆាំងនឹងគោលដៅនៅលើដីរុស្ស៊ី។ សព្វាវុធត្រូវបានគេរាយការណ៍ថាបានផ្តល់ក្នុងលក្ខខណ្ឌថាមិនត្រូវបានប្រើនៅក្រៅទឹកដី ដែលទាមទារដោយក្រុងគៀវ។ ការកំណត់នេះមានគោលបំណង ការពារកុំឲ្យមានជម្លោះកាន់តែខ្លាំងឡើង។
ទោះបីជាយ៉ាងណាក៏ដោយ នៅក្នុងបទសម្ភាសន៍ជាមួយ The Economist កាលពីសប្តាហ៍មុន លោក Stoltenberg បានអះអាងថា វាដល់ពេលហើយសម្រាប់សម្ព័ន្ធមិត្ត របស់ប្លុកយោធាដែលដឹក នាំដោយសហរដ្ឋអាមេរិក ដើម្បីពិចារណាឡើងវិញ នូវការរឹតបន្តឹងទាំងអស់នេះ។
លោកបានបញ្ជាក់ជំហររបស់លោកជាថ្មីកាលពីថ្ងៃចន្ទក្នុងអំឡុង ពេលសន្និសីទសារព័ត៌មាននៅសម័យប្រជុំនិទាឃរដូវឆ្នាំ ២០២៤ នៃសភាណាតូក្នុងទីក្រុង Sofia ប្រទេសប៊ុលហ្គារី ។
មន្ត្រីជាន់ខ្ពស់អ៊ីតាលី រួមទាំងនាយករដ្ឋមន្ត្រី Giorgia Meloni បានច្រានចោលការអំពាវនាវជាសាធារណៈរបស់ Stoltenberg សម្រាប់ការផ្លាស់ប្តូរគោលនយោបាយហើយលោក នាយករដ្ឋមន្ត្រីអ៊ីតាលីក៏ធ្លាប់បានបានណែនាំឲ្យមានការប្រុងប្រយ័ត្នបន្ថែមទៀតដែរក្នុងកិច្ចការងារនេះ ៕
ប្រែសម្រួល៖ស៊ុនលី
