សេអ៊ូល៖ មេដឹកនាំកូរ៉េខាងជើង លោក គីម ជុងអ៊ុន បានសន្យាថានឹងបន្តការអភិវឌ្ឍប្រទេស នៃផ្កាយរណបចារកម្មយោធា បើទោះបីជាការបរាជ័យកាលពីថ្ងៃចន្ទ ក្នុងការដាក់ផ្កាយរណបមួយផ្សេងទៀត ចូលទៅក្នុងគន្លងក៏ដោយ ដោយលើកឡើងថា ការកាន់កាប់សមត្ថភាព ឈ្លបយកការណ៍អវកាសគឺជា “ជៀសមិនរួច” ដើម្បីការពារអធិបតេយ្យភាព របស់ទីក្រុងព្យុងយ៉ាង នេះបើយោងតាមប្រព័ន្ធផ្សព្វផ្សាយរដ្ឋ។
ក្នុងអំឡុងពេលដំណើរទស្សនកិច្ចរបស់លោក កាលពីថ្ងៃអង្គារទៅកាន់បណ្ឌិត្យសភាវិទ្យាសាស្ត្រ ការពារជាតិដើម្បីប្រារព្ធខួបលើកទី៦០ នៃការបង្កើតរបស់ខ្លួនលោក គីម បានឲ្យដឹងថាការបាញ់បង្ហោះផ្កាយរណប នាពេលថ្មីៗនេះបានបរាជ័យ “ដោយសារតែប្រព័ន្ធបំផ្លិចបំផ្លាញដោយខ្លួនឯង” ដែលបង្កឡើងដោយ “ភាពមិនប្រក្រតីនៃម៉ាស៊ីនដំណាក់កាលដំបូង” ។
លោកបានលើកទឹកចិត្តអ្នកវិទ្យាសាស្ត្រ ការពារជាតិដោយនិយាយថា ការរៀនពីភាពបរាជ័យគឺជាតម្រូវការ ជាមុនសម្រាប់ភាពជោគជ័យ នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
លោកបានលើកឡើងថា “វាគឺតាមរយៈការបរាជ័យដែលយើងរៀនបន្ថែម និងអភិវឌ្ឍបន្ថែមទៀត” ដោយបន្ថែមថាអ្នកដែលចូលរួម ក្នុងការអភិវឌ្ឍន៍ផ្កាយរណបនឹងមិន “ក្លាយជាការបំភិតបំភ័យទេ ប៉ុន្តែនឹងខិតខំ ដើម្បីសម្រេចបានលទ្ធផលកាន់តែច្រើន” ។
សារព័ត៌មានរដ្ឋ KCNA បានចុះផ្សាយថ្ងៃពុធនេះថា ការមានផ្កាយរណបឈ្លបយកការណ៍យោធា “ជួយប្រទេសរបស់យើងពង្រឹងការ ការពារខ្លួនបន្ថែមទៀត” ចំពេលមាន “ការផ្លាស់ប្តូរធ្ងន់ធ្ងរ” ដែលកើតឡើងនៅក្នុងបរិយាកាសសន្តិសុខជាតិ ដោយសារតែ “សកម្មភាពយោធារបស់សហរដ្ឋអាមេរិក និងទង្វើបង្កហេតុផ្សេងៗ” ៕
ប្រែសម្រួល ឈូក បូរ៉ា
