តូក្យូ៖ នាយករដ្ឋមន្ត្រីជប៉ុនលោក ហ្វូមីអូ គីស៊ីដា និងប្រធានថ្មីនៃទីបញ្ជាការឥណ្ឌូប៉ាស៊ីហ្វិក របស់សហរដ្ឋអាមេរិកនៅថ្ងៃពុធនេះ បានបញ្ជាក់ពីការប្តេជ្ញាចិត្ត របស់ប្រទេសរបស់ពួកគេ ចំពោះសន្តិភាព និងស្ថិរភាពសម្រាប់តំបន់ និងសហគមន៍អន្តរជាតិ។
រដ្ឋាភិបាលជប៉ុនបានឲ្យដឹងថា ក្នុងអំឡុងកិច្ចពិភាក្សាលើកដំបូង របស់លោកជាមួយឧត្តមនាវីឯក Samuel Paparo នៅការិយាល័យនាយករដ្ឋមន្ត្រី លោក គីស៊ីដា បានប្តេជ្ញាថានឹងសហការជាមួយមេបញ្ជាការ ដើម្បីពង្រឹងការរារាំងសម្ព័ន្ធភាពជប៉ុនអាមេរិក។
ឧត្តមនាវីឯកអាមេរិកត្រូវបាន ដកស្រង់សម្តីដោយរដ្ឋាភិបាលជប៉ុន ដែលឲ្យដឹងថា សម្ព័ន្ធភាពទ្វេភាគីកាន់តែមាន សារៈសំខាន់ជាងពេលណាៗ ទាំងអស់ដោយអង្វរឱ្យសម្រេចបាននូវ “ឥណ្ឌូប៉ាស៊ីហ្វិកសេរីនិងបើកចំហ” ជាមួយទីក្រុងតូក្យូ។
លោក Paparo កំពុងបំពេញទស្សនកិច្ចទៅកាន់ប្រទេសជប៉ុន ដែលជាសម្ព័ន្ធមិត្តដ៏សំខាន់ របស់សហរដ្ឋអាមេរិកនៅអាស៊ី បន្ទាប់ពីបានចូលកាន់តំណែងពីឧត្តមនាវីឯក John Aquilino កាលពីដើមខែនេះ។
ប្រទេសទាំងពីរបាននិងកំពុង ពង្រឹងកិច្ចសហប្រតិបត្តិការផ្នែកសន្តិសុខ របស់ពួកគេរួមគ្នាជាមួយកូរ៉េខាងត្បូង ដើម្បីដោះស្រាយជាមួយនឹង ការអះអាងផ្នែកយោធា ដែលកំពុងកើនឡើងរបស់ប្រទេសចិន និងការគំរាមកំហែងអាវុធរបស់កូរ៉េខាងជើង។
កាលពីសប្តាហ៍មុន យោធារបស់ទីក្រុងប៉េកាំងបាន ធ្វើសមយុទ្ធរយៈពេលពីរថ្ងៃជុំវិញកោះតៃវ៉ាន់ បន្ទាប់ពីការចូលកាន់ តំណែងប្រធានាធិបតីថ្មីរបស់កោះនេះ គឺលោក ឡៃ ឈីងតេ ដែលទីក្រុងប៉េកាំងបានថ្កោលទោសថា ជាអ្នកបំបែកខ្លួន ៕
ប្រែសម្រួល ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
