ដាម៉ាស់៖ អ៊ីស្រាអែលបានកំណត់គោលដៅ លើទីតាំងយោធាមួយនៅក្នុងតំបន់ នៃឥទ្ធិពលរបស់ក្រុមហេសបូឡា នៅក្នុងខេត្ត Homs ភាគកណ្តាល របស់ប្រទេសស៊ីរី កាលពីយប់ថ្ងៃពុធ។
មីស៊ីលអ៊ីស្រាអែលបាន វាយប្រហារយ៉ាងហោចណាស់ ទីតាំងយោធាមួយនៅជិតទីប្រជុំជន al-Furqlus ដែលបណ្តាលឱ្យមានផ្សែង ហុយចេញពីកន្លែងនោះ នេះបើយោងតាមក្រុម សង្កេតការណ៍សិទ្ធិមនុស្សស៊ីរី។
ក្រុមបានបន្ថែមថា កងការពារប្រឆាំងយន្តហោះលើដី បានព្យាយាមស្ទាក់ចាប់កាំជ្រួច ប៉ុន្តែមិនទាន់មានព័ត៌មានអំពីការស្លាប់មនុស្សណាមួយនោះទេនេះ បើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
ក្រុមឃ្លាំមើលដែលមានមូលដ្ឋាន នៅចក្រភពអង់គ្លេសបានឲ្យដឹងថា ជំរុំ al-Furqlus ត្រូវបានគេស្គាល់ថា ជាកន្លែងដែលកងកម្លាំងហេសបូឡា និងកងជីវពលអ៊ីរ៉ង់ ត្រូវបានដាក់ពង្រាយ។
ប្រភពបានបន្ថែមថា ការវាយប្រហារនេះ គឺជាលើកទី៤២ ហើយដែលអ៊ីស្រាអែល បានកំណត់គោលដៅ លើទឹកដីស៊ីរីក្នុងឆ្នាំ២០២៣ ដែលបានបណ្តាលឱ្យមានការបំផ្លិចបំផ្លាញប្រហែល ៩០ គោលដៅ រួមទាំងឃ្លាំងអាវុធ និងគ្រាប់រំសេវ ទីស្នាក់ការកណ្តាល មជ្ឈមណ្ឌល និងយានយន្ត៕
ប្រែសម្រួល ឈូក បូរ៉ា
