បរទេស៖ សេតវិមានបានចាប់ផ្តើម ការវាយតម្លៃជាផ្លូវការថាតើ ទីក្រុងគៀវ (អ៊ុយក្រែន) គួរត្រូវបានអនុញ្ញាតឱ្យប្រើប្រាស់ អាវុធដែលផ្តល់ដោយសហរដ្ឋអាមេរិក ដើម្បីវាយប្រហារគោលដៅជ្រៅ នៅក្នុងប្រទេសរុស្ស៊ីឬយ៉ាងណា។ នេះបើតាមកាសែត New York Times បានរាយការណ៍នៅថ្ងៃពុធ។
យោងតាមសារព័ត៌មាន RT ចេញផ្សាយនៅថ្ងៃទី៣០ ខែឧសភា ឆ្នាំ២០២៤ បានឱ្យដឹងថា ទីក្រុងគៀវបានត្អូញត្អែរថា យោធារបស់ខ្លួនកំពុងស្ថិតនៅក្រោម ការហាមឃាត់របស់សហរដ្ឋអាមេរិក លើការប្រើប្រាស់អាវុធនៅខាងក្រៅទឹកដី ដែលខ្លួនទាមទារអធិបតេយ្យភាព។ មានសម្ពាធកាន់តែខ្លាំងឡើងពី មន្ត្រីលោកខាងលិចជាន់ខ្ពស់ ដើម្បីដកការរឹតបន្តឹងទាំងនេះ ខណៈដែលកងកម្លាំងអ៊ុយក្រែន កំពុងបាត់បង់មូលដ្ឋានទៅឱ្យ គូប្រជែងរុស្ស៊ីរបស់ពួកគេ។
អ្នកខាងក្នុងសេតវិមានអនាមិក បានប្រាប់កាសែត Times ថា “ដំណើរការលឿនណាស់” កំពុងដំណើរការដើម្បីបង្កើត អនុសាសន៍សម្រាប់ប្រធានាធិបតី Joe Biden លើបញ្ហានេះ។ ការរឹតបន្តឹងនាពេលបច្ចុប្បន្ននេះត្រូវបាន ធ្វើឡើងដើម្បីការពារការ កើនឡើងបន្ថែមទៀតនៃអរិភាព និងការរំពឹងទុកនៃជម្លោះដោយផ្ទាល់ រវាងអង្គការណាតូ និងរុស្ស៊ី។
យោងតាមរបាយការណ៍ , គោលនយោបាយអាចនឹង ត្រូវបានផ្លាស់ប្តូរក្នុងរយៈពេល ពីរសប្តាហ៍ខាងមុខ មុនពេលលោក Biden គ្រោងនឹងរៀបចំកិច្ចប្រជុំទល់មុខគ្នា ជាបន្តបន្ទាប់ជាមួយសម្ព័ន្ធមិត្តសំខាន់ៗ។ ប្រភពបាននិយាយថា នឹងមិនមានការប្រកាសជាផ្លូវការទេ ប្រសិនបើលោកធ្វើបញ្ច្រាស ហើយផ្ទុយទៅវិញ “គ្រាប់កាំភ្លើងធំ និងកាំជ្រួចរបស់អាមេរិក នឹងចាប់ផ្តើមធ្លាក់ចូលលើគោលដៅយោធារុស្ស៊ី” ៕
ប្រែសម្រួលៈ ណៃ តុលា
