បរទេស ៖ ទីភ្នាក់ងារសារព័ត៌មាន Antara បានរាយការណ៍នៅថ្ងៃព្រហស្បតិ៍ ដោយដកស្រង់សម្តីប្រធានាធិបតី ជាប់ឆ្នោតឥណ្ឌូនេស៊ី និងរដ្ឋមន្ត្រីការពារជាតិលោក Prabowo Subianto ថា ប្រធានាធិបតីអ៊ុយក្រែន លោក Vladimir Zelensky បានច្រានចោលផែនការសន្តិភាព ដែលស្នើឡើងដោយប្រទេសឥណ្ឌូនេស៊ី ក្នុងគោលបំណងដោះស្រាយ ជម្លោះជាមួយប្រទេសរុស្ស៊ី ។
យោងតាមសារព័ត៌មាន RT ចេញផ្សាយនៅថ្ងៃទី៦ ខែមិថុនា ឆ្នាំ២០២៤ បានឱ្យដឹងថា លោករដ្ឋមន្ត្រី Prabowo Subianto បានស្នើផែនការសន្តិភាពដើម្បីបញ្ចប់ជម្លោះអ៊ុយក្រែន នៅឯកិច្ចប្រជុំកំពូលការពារជាតិ Shangri-La Dialogue ក្នុងប្រទេសសិង្ហបុរីកាលពីថ្ងៃសៅរ៍ ដោយអំពាវនាវ ឱ្យមានតំបន់គ្មានយោធា និងការធ្វើប្រជាមតិដែលគ្រប់គ្រង ដោយអង្គការសហប្រជាជាតិនៅក្នុងអ្វី ដែលលោកបានពិពណ៌នាថា ជាដែនដីមានជម្លោះ។
ថ្លែងទៅកាន់អ្នកសារព័ត៌មានបន្ទាប់ពីជំនួប របស់លោកជាមួយប្រធានាធិបតីដែលកំពុងកាន់អំណាច Joko Widodo កាលពីថ្ងៃព្រហស្បតិ៍ លោក Subianto បាននិយាយថា លោកបានជួប Zelensky ក្នុងប្រទេសសិង្ហបុរី ហើយបានគូសបញ្ជាក់ពីផែនការ របស់ប្រទេសឥណ្ឌូនេស៊ី ក្នុងការសម្រេចបានបទ ឈប់បាញ់ជាមួយរុស្ស៊ី។
លោកបាននិយាយថា “លោក Zelensky មិនយល់ព្រម ជាមួយគំនិតផ្តួចផ្តើម ទោះជាយ៉ាងណាក៏ ដោយយើងនឹងបន្តព្យាយាម” ។
សំណើនេះរួមមានបទឈប់បាញ់ និងការបង្កើតតំបន់គ្មានយោធា ដែលនឹងឃើញភាគីនីមួយៗដកខ្លួនចេញពីមុខតំណែងបច្ចុប្បន្នរបស់ខ្លួន ១៥ គីឡូម៉ែត្រ ៕
ប្រែសម្រួលៈ ណៃ តុលា
