បរទេស៖ ទាហានកូរ៉េខាងត្បូងបានបាញ់ព្រមាន បន្ទាប់ពីទាហានកូរ៉េខាងជើងមួយក្រុមបានឆ្លង ចូលទៅក្នុងផ្នែកខាងត្បូងនៃតំបន់គ្មានយោធា (DMZ) កាលពីថ្ងៃអាទិត្យ។ នេះបើតាមអគ្គសេនាធិការរួមរបស់ទីក្រុងសេអ៊ូល (JCS) បានរាយការណ៍។
យោងតាមសារព័ត៌មាន RT ចេញផ្សាយនៅថ្ងៃទី១១ ខែមិថុនា ឆ្នាំ២០២៤ បានឱ្យដឹងថា អ្នកនាំពាក្យរបស់ JCS លោក Lee Sung-jun បានប្រាប់អ្នកសារព័ត៌មាននៅថ្ងៃអង្គារថា យោធាកូរ៉េខាងត្បូងជឿថា ការញុះញង់គឺអចេតនា។ ខណៈទាហានខ្លះប្រដាប់ដោយអាវុធ ខ្លះទៀតកាន់ឧបករណ៍ផ្សេងៗ។
ខ្សែបន្ទាត់ព្រំដែនគ្មានយោធា (MDL) ដែលបំបែកតំបន់ DMZ គឺពិបាកកត់សម្គាល់នៅកន្លែងនានា ដោយសារមានគុម្ពោតព្រៃក្រាស់។ បន្ទាប់ពីភាគីខាងត្បូងបានបាញ់ព្រមាន និងផ្សាយការព្រមានហើយ ទាហានបានត្រឡប់ទៅផ្នែកខាងជើង នៃខ្សែដែលបំបែកប្រទេសជិតខាងជាគូប្រជែង។
DMZ ត្រូវបានបង្កើតឡើងបន្ទាប់ពី សង្គ្រាមស៊ីវិលកូរ៉េនៃទសវត្សរ៍ឆ្នាំ ១៩៥០ បានបញ្ចប់នៅក្នុងបទឈប់បាញ់ ហើយត្រូវបានគេចាត់ទុកថា ជាព្រំដែនមួយក្នុងចំណោមព្រំដែន ដែលត្រូវបានការពារយ៉ាងខ្លាំងបំផុតនៅលើផែនដី។ តំបន់នេះមានចម្ងាយ ២៤៨ គីឡូម៉ែត្រ និងមានទទឹងប្រហែល ៤ គីឡូម៉ែត្រ ដោយមានវាលមានគ្រាប់មីន អន្ទាក់រថក្រោះ និងឆ្មាំប្រដាប់អាវុធ៕
ប្រែសម្រួលៈ ណៃ តុលា
