វ៉ាស៊ីនតោន៖ សេតវិមានបានឲ្យដឹងថា សហរដ្ឋអាមេរិក នឹងប្រកាសពី “សំណុំផលប៉ះពាល់” នៃទណ្ឌកម្មបន្ថែម និងសកម្មភាព ត្រួតពិនិត្យការនាំចេញប្រឆាំង នឹងរុស្ស៊ី ដែលជាផ្នែកមួយ នៃកិច្ចខិតខំប្រឹងប្រែង ដើម្បីដកហូតវិមានក្រឹមឡាំងនៃធនធានដែលប្រើ ដើម្បីទ្រទ្រង់ការឈ្លានពាន របស់ខ្លួនលើអ៊ុយក្រែន ។
អ្នកនាំពាក្យសន្តិសុខជាតិសេតវិមានលោក John Kirby បានប្រាប់អ្នកយកព័ត៌មានថា ការប្តេជ្ញាចិត្តរបស់ក្រុមប្រទេសទាំង៧ ចំពោះអ៊ុយក្រែនក៏នឹងបន្ត “ត្រឹមត្រូវ និងច្បាស់លាស់” ហើយវានឹងចាត់វិធានការយ៉ាងម៉ឺងម៉ាត់ ដើម្បីបង្ហាញប្រធានាធិបតីរុស្ស៊ីលោក វ្ល៉ាឌីមៀ ពូទីន ថា “ពេលវេលាមិនស្ថិតនៅលើលោកតែម្ខាងនោះទេ” ។
លោក Kirby បានបដិសេធមិនផ្តល់ព័ត៌មានលម្អិតទេ ប៉ុន្តែបានបន្ថែមថា សកម្មភាពថ្មី ដែលត្រូវធ្វើដោយប្រទេសប្រជាធិបតេយ្យ ឧស្សាហកម្មឈានមុខគេ របស់ពិភពលោកនឹងរួមបញ្ចូលការដោះសោតម្លៃ នៃទ្រព្យសម្បត្តិរបស់រុស្ស៊ី ដែលបានបង្កក ដើម្បីផ្តល់ផលប្រយោជន៍ ដល់អ៊ុយក្រែន និងជួយប្រទេសនេះឱ្យងើបឡើងវិញ ពីការបំផ្លិចបំផ្លាញនៃសង្រ្គាម។
នៅឯកិច្ចប្រជុំកំពូលរបស់ក្រុមនៅឆ្នាំនេះនៅភាគខាងត្បូង ប្រទេសអ៊ីតាលី ដែលចាប់ផ្តើមពីថ្ងៃព្រហស្បតិ៍ ប្រធានបទដ៏សំខាន់មួយនឹង ជារបៀបដែលល្អបំផុត ក្នុងការប្រើប្រាស់ការប្រាក់ ដែលរកបានដោយទ្រព្យសម្បត្តិរបស់រុស្ស៊ី ដែលជាប់គាំងដើម្បីជួយដល់អ៊ុយក្រែន។
ប្រភពការទូតបានឲ្យដឹងថា សមាជិក G7 រួមមានអង់គ្លេស ជប៉ុន និងសហរដ្ឋអាមេរិក កំពុងរៀបចំការបញ្ចប់ក្នុងការបង្កើតមូលនិធិជួយដល់អ៊ុយក្រែន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ចំពោះការដាក់ទណ្ឌកម្មរបស់សហរដ្ឋអាមេរិកនាពេលខាងមុខ លោក Kirby បានលើកឡើងថា ពួកគេនឹងអនុវត្តតាមការប្តេជ្ញាចិត្តមួយចំនួនដែលមេដឹកនាំ G7 បានធ្វើរហូតមកដល់បច្ចុប្បន្ន ដែលធ្វើឱ្យវាកាន់តែលំបាក សម្រាប់អ្នកសម្របសម្រួលផ្នែកហិរញ្ញវត្ថុ ក្នុងការគាំទ្រមូលដ្ឋានឧស្សាហកម្ម ការពារជាតិរបស់រុស្ស៊ី ៕
ប្រែសម្រួល ឈូក បូរ៉ា
