បរទេស៖ តុលាការធម្មនុញ្ញរបស់ប្រទេសថៃ បានឱ្យដឹងកាលពីថ្ងៃពុធថា ខ្លួននឹងបើកសវនាការលើសំណុំរឿងនៅថ្ងៃទី១៨ ខែមិថុនា ដែលអាចឈានទៅដល់ការបណ្តេញនាយករដ្ឋមន្ត្រី សេដ្ឋា ថាវីស៊ីន ពីតំណែង ជុំវិញការតែងតាំងគណៈរដ្ឋមន្ត្រីដែលត្រូវបានចោទប្រកាន់ថាបានបំពានរដ្ឋធម្មនុញ្ញ។
យោងតាមសារព័ត៌មាន Bangkok Post ចេញផ្សាយនៅថ្ងៃទី១២ ខែមិថុនា ឆ្នាំ២០២៤ បានឱ្យដឹងថា សំណុំរឿងប្រឆាំងនឹងលោក សេដ្ឋា ថាវីស៊ីន គឺបានធ្វើតាមពាក្យបណ្តឹងរបស់សមាជិកព្រឹទ្ធសភាដែលតែងតាំងដោយយោធាចំនួន ៤០ នាក់កាលពីខែឧសភា ដែលត្រូវបានទទួលយកជាបន្តបន្ទាប់ដោយតុលាការធម្មនុញ្ញ។ សំណុំរឿងនេះពាក់ព័ន្ធនឹងការតែងតាំងអ្នកនយោបាយដ៏ចម្រូងចម្រាសគឺលោក Pichit Chuenban ជារដ្ឋមន្ត្រីទីស្តីការគណៈរដ្ឋមន្ត្រី។
សមាជិកព្រឹទ្ធសភាបានសួរទៅតុលាការថា តើលោក សេដ្ឋា ថាវីស៊ីន និងលោក Pichit Chuenban គួរតែត្រូវដកចេញពីតំណែងតាមមាត្រា ១៧០ (៤) និង (៥) នៃធម្មនុញ្ញដែលទាក់ទងនឹងក្រមសីលធម៌របស់គណៈរដ្ឋមន្ត្រីដែរឬទេ?
លោក Pichit ត្រូវបានកាត់ទោសឱ្យជាប់ពន្ធនាគាររយៈពេលប្រាំមួយខែ ក្នុងឆ្នាំ ២០០៨ និងបានបម្រើការរួមជាមួយនឹងសហការីពីរនាក់បន្ទាប់ពីពួកគេបានព្យាយាមសូកប៉ាន់មន្ត្រីតុលាការកំពូលដោយប្រគល់ឱ្យពួកគេនូវថង់ក្រដាសដែលមានប្រាក់ ២ លានបាតនៅក្នុងប្រអប់អាហារថ្ងៃត្រង់មួយ។ លោក Pichit ត្រូវបានអ្នករិះគន់ចាត់ទុកថា មិនសមនឹងធ្វើជារដ្ឋមន្ត្រីគណៈរដ្ឋមន្ត្រី។
យ៉ាងណាក៏ដោយ លោក Pichit Chuenban បានលាលែងពីតំណែង មុនពេលតុលាការទទួលយកញត្តិនេះ ដែលត្រូវបានគេមើលឃើញថាជាការការពារលោក សេដ្ឋា ថាវីស៊ីន ពីជម្លោះផ្លូវច្បាប់។ តុលាការបានយល់ព្រមបើកសវនាការលើសំណុំរឿងលោក សេដ្ឋា ថាវីស៊ីន ដោយបដិសេធសំណុំរឿងលោក Pichit Chuenban ព្រោះលោកបានលាលែងពីតំណែងរួចទៅហើយ៕ ប្រែសម្រួលៈ ណៃ តុលា
