វ៉ាស៊ីនតោន៖ រដ្ឋមន្ត្រីការបរទេសអាមេរិក លោក Antony Blinken បានឲ្យដឹងថា ការឆ្លើយតបរបស់ក្រុមហាម៉ាស់ ចំពោះសំណើបទឈប់បាញ់សម្រាប់ចំណាប់ខ្មាំង ដែលគាំទ្រដោយសហរដ្ឋអាមេរិក រួមមាន “ការផ្លាស់ប្តូរជាច្រើន” ចំពោះអ្វីដែលបានបង្ហាញដំបូង ដែលមួយចំនួនមិនអាចទទួលយកបាន។
លោក Blinken បានប្រាប់សន្និសីទសារព័ត៌មាននៅទីក្រុងដូហា ប្រទេសកាតាថា សហរដ្ឋអាមេរិកបានទទួលការឆ្លើយតបពីក្រុមហាម៉ាស់ តាមរយៈអ្នកសម្របសម្រួលកាតា និងអេហ្ស៊ីប ចំពោះផែនទីបង្ហាញផ្លូវ ៣ដំណាក់កាលទៅកាន់បទឈប់បាញ់អចិន្ត្រៃយ៍នៅតំបន់ហ្គាហ្សា ដែលប្រធានាធិបតីអាមេរិកលោក ចូ បៃដិន បានប្រកាសកាលពីចុងខែឧសភា។ សំណើនេះត្រូវបានរៀបចំឡើងផងដែរ ដើម្បីធានាការដោះលែងចំណាប់ខ្មាំងទាំងអស់ដែលក្រុមហាម៉ាស់ចាប់ខ្លួន។
លោក Blinken បានលើកឡើងថា “ក្រុមហាម៉ាស់បានស្នើការផ្លាស់ប្តូរជាច្រើន ចំពោះសំណើដែលមាននៅលើតុ។ យើងបានពិភាក្សាអំពីការផ្លាស់ប្តូរទាំងនោះកាលពីយប់មិញជាមួយសហសេវិកអេហ្ស៊ីប និងថ្ងៃនេះជាមួយនាយករដ្ឋមន្ត្រី នៃប្រទេសកាតា ការផ្លាស់ប្តូរមួយចំនួនអាចដំណើរការបាន ខ្លះមិនអាចធ្វើបាននោះទេ”។
លោក បានបន្ដថា សំណើបច្ចុប្បន្នគឺ “ដូចគ្នាបេះបិទ” ទៅនឹងអ្វីដែលក្រុមហាម៉ាស់ បានដាក់ចេញនៅក្នុងសំណើរបស់ពួកគេផ្ទាល់ ដែលបានដាក់នៅថ្ងៃទី០៦ ខែឧសភា ប៉ុន្តែក្រុមហាម៉ាស់បានធ្វើការផ្លាស់ប្តូរ “មួយចំនួន” ដែល “ហួសពីមុខតំណែង ដែលខ្លួនបានទទួលយក និងទទួលយកពីមុន” ។
លោកបានបញ្ជាក់ជាថ្មីថា កិច្ចព្រមព្រៀងបច្ចុប្បន្នត្រូវបានអ៊ីស្រាអែល «ទទួលយក» បើទោះជាមានការពិតដែលខ្លះក្នុងក្រុមខាងស្ដាំរបស់រដ្ឋាភិបាលអ៊ីស្រាអែលបានប្រឆាំងនឹងវាក៏ដោយ៕ ប្រែសម្រួល ឈូក បូរ៉ា
