ប៉េកាំង៖ ក្រសួងពាណិជ្ជកម្មចិនបានឲ្យដឹងថា ប្រទេសចិនរក្សាសិទ្ធិក្នុង ការប្តឹងទៅអង្គការពាណិជ្ជកម្មពិភពលោក (WTO) ពាក់ព័ន្ធនឹងផែនការរបស់សហភាពអឺរ៉ុប ដើម្បីយកពន្ធបណ្តោះអាសន្នលើការ នាំចូលរថយន្តអគ្គិសនីរបស់ចិន (EVs)។
អ្នកនាំពាក្យរបស់ក្រសួងលោក He Yadong បានឲ្យដឹងនៅក្នុងសន្និសីទ សារព័ត៌មានមួយថា ការរកឃើញដោយភាគីអឺរ៉ុប នៅក្នុងការលាតត្រដាងជាមុនរបស់ខ្លួន ខ្វះទាំងការពិត និងមូលដ្ឋានច្បាប់។
អ្នកនាំពាក្យរូបនេះ បានបញ្ជាក់ថា ទង្វើនេះមិនត្រឹមតែបំផ្លាញសិទ្ធិ និងផលប្រយោជន៍ស្របច្បាប់នៃឧស្សាហកម្ម EV របស់ចិនប៉ុណ្ណោះទេ ប៉ុន្តែថែមទាំងរំខានដល់កិច្ចសហប្រតិបត្តិការរវាងចិន និងអឺរ៉ុប ក្នុងវិស័យយានយន្តថាមពលថ្មី និងធ្វើឱ្យខូចទ្រង់ទ្រាយខ្សែសង្វាក់ផ្គត់ផ្គង់ និងឧស្សាហកម្មរថយន្តសកល រួមទាំងនៅក្នុងសហភាពអឺរ៉ុបផងដែរ។
លោកបានលើកឡើងថា សកម្មភាពបែបនេះគឺជា “លទ្ធិគាំពារនិយមដោយឥតលាក់លៀម” ហើយវាត្រូវបានគេសង្ស័យថា បានបំពានច្បាប់របស់ WTO ហើយប្រទេសចិន នឹងចាត់វិធានការចាំបាច់ទាំងអស់ ដើម្បីការពារសិទ្ធិ និងផលប្រយោជន៍ស្របច្បាប់ របស់សហគ្រាសចិន។
ប្រទេសចិនជំរុញឱ្យ សហភាពអឺរ៉ុប កែតម្រូវកំហុស របស់ខ្លួនជាបន្ទាន់ អនុវត្តការឯកភាពសំខាន់ៗ ដែលសម្រេចបានក្នុង កិច្ចប្រជុំត្រីភាគីចិន-បារាំង-សហភាពអឺរ៉ុបនាពេលថ្មីៗនេះ និងដោះស្រាយជម្លោះ សេដ្ឋកិច្ច និងពាណិជ្ជកម្មតាមរយៈការសន្ទនា។
កាលពីថ្ងៃពុធ គណៈកម្មការអឺរ៉ុបបានចេញសេចក្តីថ្លែងការណ៍មួយ ដែលបង្ហាញពីកម្រិតនៃកាតព្វកិច្ចបណ្ដោះអាសន្ននៃអ្នកការពារដែលខ្លួននឹងដាក់លើការនាំចូលអាគុយ EV ពីប្រទេសចិន៕
ប្រែសម្រួល ឈូក បូរ៉ា
