ប៉េកាំង៖ បទប្បញ្ញត្តិ ដែលបានធ្វើបច្ចុប្បន្នភាព ដែលអនុញ្ញាតឱ្យឆ្មាំឆ្នេរសមុទ្ររបស់ចិន ឃាត់ខ្លួនជនបរទេស ដែលសង្ស័យថា បានរំលោភបំពាន នៅក្នុងដែនទឹក ដែលខ្លួនអះអាងថា មានរយៈពេលរហូតដល់ ៦០ ថ្ងៃបានចូលជាធរមាននៅថ្ងៃសៅរ៍នេះ ដោយបង្កើនការព្រួយបារម្ភនៅក្នុងប្រទេស ដូចជាហ្វីលីពីន ដែលមានជម្លោះអធិបតេយ្យភាពជាមួយខ្លួន។
ការអភិវឌ្ឍន៍ថ្មីនេះ ត្រូវបានគេភ័យខ្លាចថានឹងបង្កើនភាពតានតឹងបន្ថែមទៀតនៅក្នុងសមុទ្រចិនខាងត្បូង ដែលនាវាចិន និងហ្វីលីពីនតែងតែ ប្រឈមមុខដាក់គ្នា ដោយកន្លងមកឆ្មាំសមុទ្រចិន ក៏ធ្លាប់បានបាញ់កាណុងបាញ់ទឹក ទៅលើនាវាហ្វីលីពីនផងដែរ។
ប្រទេសចិន ទាមទារស្ទើរតែទាំងស្រុងនូវសមុទ្រចិនខាងត្បូង ដែលជាផ្លូវដឹកជញ្ជូនដ៏សំខាន់ និងជាតំបន់នេសាទដ៏សម្បូរបែប។ ហ្វីលីពីន វៀតណាម ម៉ាឡេស៊ី ប្រ៊ុយណេ និងតៃវ៉ាន់ ក៏មានការទាមទារប្រកួតប្រជែងក្នុងសមុទ្រដែរ។
ទីក្រុងប៉េកាំង ក៏ទាមទារប្រជុំកោះសេនកាគូ ដែលគ្រប់គ្រងដោយជប៉ុន នៅសមុទ្រចិនខាងកើត ដោយហៅពួកគេថា ដាយយូ ហើយតែងតែបញ្ជូនកប៉ាល់ របស់ខ្លួននៅជិតកោះតូចៗ។
បទប្បញ្ញត្តិដែលបានធ្វើបច្ចុប្បន្នភាព ដែលបានបង្ហាញនៅក្នុងខែឧសភាឆ្នាំនេះ បង្ហាញពីនីតិវិធីក្នុងការបង្ក្រាបសកម្មភាពដែនសមុទ្រខុសច្បាប់។ វាមានគោលបំណងអនុវត្តយ៉ាង ហ្មត់ចត់នូវវិធានដែលចូលជាធរមាន ក្នុងឆ្នាំ២០២១ ដើម្បីអនុញ្ញាតឱ្យឆ្មាំឆ្នេរសមុទ្រ ប្រើអាវុធប្រឆាំងនឹងនាវាបរទេស ដែលត្រូវបានគេចាត់ទុកថា បានចូលដែនទឹករបស់ចិន ដោយខុសច្បាប់៕
ប្រែសម្រួល ឈូក បូរ៉ា
