យូអិន៖ អគ្គលេខាធិការអង្គការ សហប្រជាជាតិលោក Antonio Guterres បានសម្តែង “ការព្រួយបារម្ភយ៉ាងខ្លាំង” លើការកើនឡើង នៃអំពើហិង្សា និងវោហាសាស្ត្រដ៏តឹងតែង” រវាងអ៊ីស្រាអែលនិងពួកសកម្មប្រយុទ្ធហេសបូឡា នៅទូទាំងព្រំដែន ជាមួយប្រទេសលីបង់។
ថ្លែងទៅកាន់អ្នកសារព័ត៌មាន នៅទីស្នាក់ការអង្គការ សហប្រជាជាតិ នៅទីក្រុងញូវយ៉ក អគ្គលេខាធិការអង្គការ សហប្រជាជាតិ បានព្រមានថា ទង្វើមិនពិតមួយអាចបង្ក ឱ្យមានមហន្តរាយសម្រាប់តំបន់ទាំងមូល និងលើសពីនេះ។
លោកបានលើកឡើងថា “ចលនាខុសមួយ ឬការគណនាខុសមួយ អាចបង្កឱ្យមានមហន្តរាយ ដែលហួសពីព្រំដែន ហើយនិយាយដោយត្រង់ទៅគឺ អាចហួសពីការស្មាន” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកបានគូសបញ្ជាក់ថា ការពង្រីកជម្លោះនៅមជ្ឈិមបូព៌ា ត្រូវតែជៀសវាង។ លោកបានសង្កត់ធ្ងន់ថា “សូមបញ្ជាក់ឲ្យច្បាស់ថា ប្រជាជនក្នុងតំបន់ និងប្រជាជនក្នុងពិភពលោកមិនអាចមានលទ្ធភាពឲ្យប្រទេសលីបង់ក្លាយជាតំបន់ហ្គាហ្សា មួយផ្សេងទៀតបាននោះទេ”។
ប្រធានអង្គការសហប្រជាជាតិរូបនេះ បានកត់សម្គាល់ថា នៅសងខាង នៃខ្សែបន្ទាត់ពណ៌ខៀវ មនុស្សជាច្រើន បានបាត់បង់ជីវិតហើយ ហើយមនុស្សរាប់ម៉ឺននាក់ ត្រូវបានបណ្តេញ ចេញពីផ្ទះរបស់ពួកគេ ជាមួយនឹងជីវភាពរស់ នៅរបស់ពួកគេត្រូវបានបំផ្លាញ៕
ប្រែសម្រួល ឈូក បូរ៉ា
