ប៉េកាំង៖ អ្នកនាំពាក្យក្រសួងការពារជាតិចិន បានសម្តែងការប្រឆាំងយ៉ាងខ្លាំង ចំពោះសហរដ្ឋអាមេរិក និងប្រទេសលោកខាងលិចមួយចំនួនទៀត ចំពោះការបង្វែរការស្តីបន្ទោសជុំវិញវិបត្តិអ៊ុយក្រែន ។
លោក Wu Qian អ្នកនាំពាក្យក្រសួងការពារជាតិ បានធ្វើការកត់សម្គាល់នៅក្នុងសន្និសីទសារព័ត៌មាន មួយកាលពីថ្ងៃព្រហស្បតិ៍ នៅពេលឆ្លើយតបទៅនឹងការស៊ើបអង្កេត ទាក់ទងនឹងសេចក្តីថ្លែងការណ៍របស់មេដឹកនាំ G7 នាពេលថ្មីៗនេះ។
លោកបានចង្អុលបង្ហាញថា ទិន្នន័យបង្ហាញថាជាង ៦០ភាគរយនៃសមាសធាតុអាវុធ និងទំនិញប្រើប្រាស់ពីរដែលរុស្ស៊ី បាននាំចូលគឺមកពីសហរដ្ឋអាមេរិក និងបណ្តាប្រទេសលោកខាងលិចផ្សេងទៀត។
លោកបានលើកឡើងថា ការអនុវត្តនៃការរក្សាពាណិជ្ជកម្មជាមួយរុស្ស៊ី ខណៈពេលដែលមានការជ្រៀតជ្រែក និងធ្វើឱ្យខូចដល់កិច្ចសហប្រតិបត្តិការ ធម្មតារវាងចិន និងរុស្ស៊ី គឺជាការលាក់ពុតយ៉ាងខ្លាំង។
អ្នកនាំពាក្យបានបញ្ជាក់ថា “ជំនួសឱ្យការឆ្លុះបញ្ចាំងពីតួនាទីរបស់ ពួកគេផ្ទាល់នៅក្នុងវិបត្តិអ៊ុយក្រែន សហរដ្ឋអាមេរិក និងប្រទេសលោកខាងលិចផ្សេងទៀត បានផ្លាស់ប្តូរការស្តីបន្ទោសម្តងហើយម្តងទៀត មកលើប្រទេសចិន ដែលយើងប្រឆាំងយ៉ាងម៉ឺងម៉ាត់” ៕
ប្រែសម្រួល ឈូក បូរ៉ា
