ប៉េកាំង៖ ប្រទេសចិន បានអំពាវនាវ ឱ្យអ៊ីស្រាអែលបំពេញកាតព្វកិច្ចរបស់ខ្លួននៅក្រោមច្បាប់មនុស្សធម៌អន្តរជាតិ និងគោរពតាមការអំពាវនាវ របស់សហគមន៍អន្តរជាតិ ដើម្បីធានាការចូលយ៉ាងលឿន និងសុវត្ថិភាព នៃការផ្គត់ផ្គង់មនុស្សធម៌ចូលទៅក្នុងហ្គាហ្សា។
នៅក្នុងសុន្ទរកថានៅឯសន្និសីទក្រុមប្រឹក្សាសន្តិសុខអង្គការសហប្រជាជាតិ ស្តីពីស្ថានភាពនៅមជ្ឈិមបូព៌ា រួមទាំងសំណួរប៉ាឡេស្ទីន តំណាងអចិន្ត្រៃយ៍របស់ចិន ប្រចាំនៅអង្គការសហប្រជាជាតិលោក Fu Cong បានលើកឡើងពីវិបត្តិមនុស្សធម៌ធ្ងន់ធ្ងរនៅតំបន់ហ្គាហ្សា ដែលកាន់តែធ្ងន់ធ្ងរឡើងដោយសារកង្វះខាតការផ្គត់ផ្គង់សំខាន់ៗ និងស្ថានភាពសុខភាពធ្ងន់ធ្ងរ។
លោកបានកត់សម្គាល់ថា “មនុស្សរាប់លាននាក់ កំពុងតស៊ូជាមួយភាពអត់ឃ្លាន ជំងឺ ការឈឺចាប់ និងភាពអស់សង្ឃឹម” ដោយពណ៌នាអំពីស្ថានភាពនេះថា ជាគ្រោះមហន្តរាយមនុស្សធម៌ ដែលបង្កើតឡើងដោយមនុស្ស និងជាការបំពានយ៉ាងធ្ងន់ធ្ងរនៃច្បាប់អន្តរជាតិ។
លោក Fu បានចង្អុលបង្ហាញថា តំបន់ហ្គាហ្សា បានស្ថិតនៅក្រោមការបិទផ្លូវអស់រយៈពេល ៩ ខែដោយមានមនុស្សជាង ២លាននាក់រស់នៅក្នុង “គុកបើកចំហ” ដោយគ្មានលទ្ធភាពទទួលបានទឹក អគ្គិសនី អាហារ ឱសថ និងប្រេងឥន្ធនៈគ្រប់គ្រាន់។
លោកបានរិះគន់ការបិទច្រកឆ្លង កាត់ទីក្រុងវ៉ាហ្វា ដោយសារតែប្រតិបត្តិការយោធារបស់អ៊ីស្រាអែល ដែលបានធ្វើឱ្យរថយន្តដឹកទំនិញ រាប់ពាន់គ្រឿងផ្ទុកដោយការផ្គត់ផ្គង់មនុស្សធម៌ រង់ចាំជាជួរយ៉ាងវែងអន្លាយ៕
ប្រែសម្រួល ឈូក បូរ៉ា
