បរទេស៖ ប្រធានាធិបតីបេឡារុស្ស លោក Alexander Lukashenko បាននិយាយថា ប្រទេសលោកខាងលិច “មិនអាចរង់ចាំ” ដើម្បីអូសបេឡារុស ចូលទៅក្នុង “ជម្លោះយោធា” របស់ពួកគេ ដោយលោកបានធ្វើអត្ថាធិប្បាយលើរបាយការណ៍ថ្មីៗអំពីកងកម្លាំងអ៊ុយក្រែន និងណាតូ ដែលប្រមូលផ្តុំគ្នានៅតាមព្រំដែននៃប្រទេស ដែលជាសម្ព័ន្ធមិត្តដ៏សំខាន់របស់រុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៣ ខែកក្កដា ឆ្នាំ២០២៤ បានឱ្យដឹងថា លោក Lukashenko បានធ្វើការកត់សម្គាល់ក្នុងអំឡុងពេលជួបជាមួយសមាជិកសភាកំពូលរបស់រុស្ស៊ី លោក Vyacheslav Volodin។ ប្រធានសភាជាន់ទាបនៃសភារុស្ស៊ី គឺកំពុងធ្វើទស្សនកិច្ចនៅទីក្រុង Minsk ប្រទេសបេឡារុស្ស សម្រាប់ការប្រារព្ធទិវាបុណ្យឯករាជ្យជាតិបេឡារុស្សនៅថ្ងៃទី ៣ ខែកក្កដា។
លោក Lukashenko បាននិយាយ ហើយត្រូវបានទីភ្នាក់ងារសារព័ត៌មាន BELTA ដកស្រង់សម្តីថា “ខ្ញុំគិតថាអ្នក… ឃើញអ្វីដែលកំពុងកើតឡើងនៅជុំវិញប្រទេសបេឡារុស្ស។ ពួកគេមិនអាចរង់ចាំដើម្បីអូសយើងចូលទៅក្នុងជម្លោះយោធារបស់ពួកគេ។ [ពួកគេកំពុងធ្វើវា] ដើម្បីធ្វើឱ្យយើងលាតសន្ធឹងកម្លាំងរបស់យើងនៅតាមព្រំដែន ដើម្បីធ្វើឱ្យយើងមិនអាចអត់ធ្មត់បាន និងធ្វើឱ្យស្ថានការណ៍កាន់តែកើនឡើងដល់ចំណុចដែលពិភពលោកទាំងមូលនឹងញ័រ” ។
កាលពីចុងសប្តាហ៍កន្លងទៅ ក្រសួងការពារជាតិបេឡារុស្សបានចេញសេចក្តីថ្លែងការណ៍ជាច្រើនដោយអះអាងថា ប្រទេសអ៊ុយក្រែន និងអង្គការណាតូ កំពុងប្រមូលផ្តុំកងទ័ពនៅតាមព្រំដែនរបស់ប្រទេសបេឡារុស្ស។ បេឡារុស្ស មានព្រំប្រទល់ជាប់សមាជិកណាតូ រួមមាន ប្រទេស ឡាតវី លីទុយអានី និងប៉ូឡូញ ព្រមទាំងអ៊ុយក្រែន និងរុស្ស៊ី៕ ប្រែសម្រួលៈ ណៃ តុលា
