បរទេស៖ លោក Mladen Plese អ្នកវិភាគនយោបាយក្រូអាត បានឲ្យដឹងនៅក្នុងបទសម្ភាសន៍ ជាមួយកាសែត ស៊ិនហួឲ្យដឹងថា អង្គការសន្ធិសញ្ញាអាត្លង់ទិកខាងជើង (ណាតូ) មិនត្រូវក្លាយជាឧបករណ៍ របស់សហរដ្ឋអាមេរិក ក្នុងការអនុវត្តគោលនយោបាយរបស់ខ្លួនជុំវិញពិភពលោក ដោយដើរតួជាអ្នកពង្រីកឥទ្ធិពលរបស់ទីក្រុងវ៉ាស៊ីនតោន។
លោកបានឲ្យដឹងថា “សហរដ្ឋអាមេរិក បានប្រើប្រាស់ណាតូ ដើម្បីអនុវត្តគោលនយោបាយរបស់ខ្លួន និងមានឥទ្ធិពល សម្រេចចិត្តលើអង្គការណាតូ នេះមិនល្អសម្រាប់ដៃគូអឺរ៉ុបនោះ។ អង្គការណាតូ មិនត្រូវជាដៃ របស់វ៉ាស៊ីនតោននោះទេ ហើយបណ្តាប្រទេសនៅអឺរ៉ុប កាន់តែច្រើនកំពុងព្រមានអំពីរឿងនេះ” ។
យោងតាមអ្នកវិភាគ ណាតូគួរតែបំពេញមុខងារដូចជាការរក្សាសន្តិភាព និងទប់ស្កាត់ជម្លោះ ជាជាងចាប់ផ្តើម ឬចូលរួមក្នុងសង្គ្រាម និងជម្លោះយោធាជុំវិញពិភពលោក ដូចដែលខ្លួនបានធ្វើក្នុងប៉ុន្មានឆ្នាំចុងក្រោយនេះ ក្រោមការដឹកនាំរបស់សហរដ្ឋអាមេរិក។
លោកបានលើកឡើងថា វិបត្តិអ៊ុយក្រែន គឺជាឧទាហរណ៍ចុងក្រោយបង្អស់នៃឥទ្ធិពលរបស់សហរដ្ឋអាមេរិក នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លើសពីនេះទៅទៀត សហរដ្ឋអាមេរិក បានព្យាយាមពង្រឹងអង្គការណាតូ តាមរយៈការបង្កើនការចូលរួម របស់ខ្លួននៅក្នុងតំបន់អាស៊ីបូព៌ា ដែលមិនមែនជាផលប្រយោជន៍របស់អឺរ៉ុប នេះបើយោងតាមលោក Plese ។
លោកបានលើកឡើងថា “អង្គការណាតូកំពុងត្រូវ បានប្រើប្រាស់ក្នុងនាមផល ប្រយោជន៍របស់អាមេរិក ដើម្បីរឹតបន្តឹងស្ថានភាពនៅក្នុងតំបន់អាស៊ីប៉ាស៊ីហ្វិក ដែលមិនឆ្លើយតបទៅនឹងផលប្រយោជន៍ របស់អឺរ៉ុបទាល់តែសោះ នោះហើយជាមូលហេតុ ដែលខ្ញុំជឿថាពេលវេលា នឹងមកដល់នៅពេលដែលអឺរ៉ុប នឹងអភិវឌ្ឍកងកម្លាំងការពារផ្ទាល់ខ្លួន របស់ពួកគេដែលនឹងមិន ពឹងផ្អែកលើអង្គការណាតូ”៕
ប្រែសម្រួល ឈូក បូរ៉ា
