ហ្គាហ្សា៖ យ៉ាងហោចណាស់ សាកសពជនជាតិប៉ាឡេស្ទីន ៦០នាក់ ត្រូវបានរកឃើញនៅតាមដងផ្លូវ និងតាមផ្ទះនានា បន្ទាប់ពីកងទ័ពអ៊ីស្រាអែល បានដកខ្លួនចេញពីសង្កាត់មួយចំនួន នៃទីក្រុងហ្គាហ្សា ភាគខាងជើងហ្គាហ្សាស្ទ្រីប។
សេវាកម្មការពារជនស៊ីវិលបានឲ្យដឹងថា សមាជិកនាវិករបស់ខ្លួនបានចាប់ផ្តើមជួយសង្គ្រោះអ្នកស្លាប់ពីសង្កាត់ Tal al-Hawa និងតំបន់មួយចំនួននៅភាគខាងលិចទីក្រុងបន្ទាប់ពីការដកទ័ពរបស់កងទ័ពអ៊ីស្រាអែល។
កងកម្លាំងការពារអ៊ីស្រាអែល (IDF) បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃសុក្រថា កងទ័ពរបស់ខ្លួនបានចាប់ផ្តើមប្រតិបត្តិការ “ប្រឆាំងអំពើភេរវកម្ម” នៅក្នុងតំបន់កាលពីដើមសប្តាហ៍នេះ បន្ទាប់ពីស៊ើបការណ៍បានបង្ហាញថា ក្រុមសកម្មប្រយុទ្ធហាម៉ាស់ និងជីហាតអ៊ីស្លាម និងហេដ្ឋារចនាសម្ព័ន្ធត្រូវបានបង្កប់នៅខាងក្នុងទីស្នាក់ការកណ្តាល UNRWA នៅទីក្រុងហ្គាហ្សា។
IDF បានឲ្យដឹងនៅលើគណនីបណ្ដាញសង្គម X របស់ខ្លួនកាលពីថ្ងៃសុក្រថា ខ្លួនបានរកឃើញអាវុធជាច្រើននៅក្នុងបរិវេណក្បែរទីស្នាក់ការរបស់ UNRWA ។ ប្រភពបានឲ្យដឹងថា កងទ័ពបានបើក “ច្រករបៀងដែលបានកំណត់” ដើម្បីឱ្យជនស៊ីវិលអាចជម្លៀសចេញពីតំបន់នេះនៅពេលចាប់ផ្តើមប្រតិបត្តិការ។
កាលពីថ្ងៃព្រហស្បតិ៍ សាកសពជាង ៦០នាក់ក៏ត្រូវបានរកឃើញពីគំនរបាក់បែកនៅសង្កាត់ Shujaiya ភាគខាងកើតនៃទីក្រុងហ្គាហ្សា បន្ទាប់ពីការវាយលុកលើដីរបស់អ៊ីស្រាអែលរយៈពេល ២ សប្តាហ៍៕
ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)