តូក្យូ៖ មន្ត្រីកំពូលនៃប្រទេសជប៉ុន សហរដ្ឋអាមេរិក និងកូរ៉េខាងត្បូង បានសន្យារួមគ្នាថា នឹងបន្តជំរុញកិច្ចសហប្រតិបត្តិការត្រីភាគី ដើម្បីសម្រេចបាននូវសន្តិភាពក្នុងតំបន់ និងពិភពលោក ចំពេលមានការកើនឡើងនៃបញ្ហាប្រឈមផ្នែកសន្តិសុខ ដែលបង្កឡើងដោយប្រទេសចិន និងកូរ៉េខាងជើង។
លោកឧត្តមសេនីយ Yoshihide Yoshida ប្រធានសេនាធិការចម្រុះនៃក្រសួងការពារជាតិជប៉ុន និងសមភាគីអាមេរិកឧត្តមសេនីយ៍ Charles Brown និងភាគីកូរ៉េខាងត្បូងឧត្តមនាវីឯក Kim Myung Soo បានប្រមូលផ្តុំគ្នានៅទីក្រុងតូក្យូ ហើយវាជាលើកដំបូងសម្រាប់ប្រទេសជប៉ុនដែលធ្វើជាម្ចាស់ផ្ទះកិច្ចពិភាក្សាបែបនេះ។
យោងតាមសេចក្តីថ្លែងការណ៍រួម ដែលចេញបន្ទាប់ពីកិច្ចប្រជុំរបស់ពួកគេ មន្រ្តីឯកសណ្ឋានជាន់ខ្ពស់ទាំងបី បានយល់ព្រម “បន្តពង្រឹងកិច្ចសហប្រតិបត្តិការសន្តិសុខត្រីភាគី ដើម្បីជំរុញសន្តិភាព និងសន្តិសុខនៅលើឧបទ្វីបកូរ៉េ នៅឥណ្ឌូប៉ាស៊ីហ្វិក និងលើសពីនេះទៀត”។
ភាគីទាំងបីបានជំរុញឱ្យកូរ៉េខាងជើង “បញ្ឈប់សកម្មភាពអស្ថិរភាពទាំងអស់ជាបន្ទាន់” ដូចជាកម្មវិធីអភិវឌ្ឍន៍នុយក្លេអ៊ែរ និងមីស៊ីលរបស់ខ្លួន ហើយបានថ្កោលទោសការពង្រីកទំនាក់ទំនងយោធារបស់ខ្លួនជាមួយរុស្ស៊ី។
មន្ត្រីទាំងបីរូបក៏បានជំទាស់នឹង “ការប៉ុនប៉ងឯកតោភាគីណាមួយ ដើម្បីផ្លាស់ប្តូរស្ថានភាពបច្ចុប្បន្នដោយកម្លាំង” នៅក្នុងតំបន់ឥណ្ឌូប៉ាស៊ីហ្វិក ដោយថា “អាកប្បកិរិយាគ្រោះថ្នាក់កាន់តែកើនឡើងរបស់ចិន និងឈ្លានពានដែលគាំទ្រការទាមទារដែនសមុទ្រខុសច្បាប់” នៅក្នុងដែនទឹកក្នុងតំបន់ រួមទាំងសមុទ្រចិនខាងត្បូងផងដែរ៕
ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)