បរទេស៖ លោក ផាម មិញជីញ នាយករដ្ឋមន្ដ្រីវៀតណាម បានបញ្ជា ឱ្យក្រសួងសន្តិសុខសាធារណៈ និងកិច្ចការបរទេស ពិចារណាលើការលើកលែងទិដ្ឋាការ សម្រាប់ប្រទេសមួយចំនួន ដើម្បីជំរុញការស្តារ ទេសចរណ៍ឡើងវិញ។
យោងតាមសារព័ត៌មាន VN EXPRESS ចេញផ្សាយ កាលពីថ្ងៃទី១៩ ខែកក្កដា ឆ្នាំ២០២៤ បានឱ្យដឹងថា ក្នុងជំនួបជាមួយ ប្រធានទីភ្នាក់ងារតំណាងវៀតណាម នៅបរទេសកាលពីថ្ងៃព្រហស្បតិ៍ នាយករដ្ឋមន្ត្រី ផាម មិញជីញ បានស្នើឱ្យទីភ្នាក់ងារ ស្រាវជ្រាវ គោលនយោបាយទិដ្ឋាការ សមស្រប ដើម្បីបង្កលក្ខណៈងាយស្រួល សម្រាប់ភ្ញៀវ ទេសចរបរទេស និងជួយបង្កើតសន្ទុះ សម្រាប់ការងើបឡើងវិញ នៃវិស័យទេសចរណ៍។
លោកបន្តថា៖ «ក្រសួងសន្តិសុខសាធារណៈគួរតែសហការជាមួយក្រសួងការបរទេសដើម្បីលើកលែងទិដ្ឋាការសម្រាប់ប្រទេសមួយចំនួន»។
ឥឡូវនេះ ប្រទេសវៀតណាមបានលើកលែងទិដ្ឋាការសម្រាប់អ្នកធ្វើដំណើរមកពី ២៥ ប្រទេស បើធៀបនឹងម៉ាឡេស៊ី និងសិង្ហបុរី បានលើកលែងទិដ្ឋការសម្រាប់ប្រទេសចំនួន១៦២ សម្រាប់ហ្វីលីពីន ១៥៧ ប្រទេស និង សម្រាប់ប្រទេសថៃ លើកលែង ៩៣ ប្រទេស។
ប្រទេសអាស៊ីជាច្រើនកំពុងបង្កើនការប្រកួតប្រជែងរបស់ខ្លួនដើម្បីទាក់ទាញភ្ញៀវទេសចរបរទេសដោយមានគោលនយោបាយគ្មានទិដ្ឋាការ ។ ប្រទេសថៃកាលពីថ្ងៃច័ន្ទបានបង្កើនចំនួនប្រទេស និងដែនដីដែលរីករាយនឹង ការស្នាក់នៅដោយគ្មានទិដ្ឋាការ រយៈពេល ៦០ ថ្ងៃរបស់ខ្លួនពី ៥៧ ទៅ ៩៣ប្រទេស ខណៈដែលឥណ្ឌូនេស៊ី គ្រោងនឹងផ្តល់ការចូលទស្សនាដោយគ្មានទិដ្ឋាការទៅកាន់គោលដៅចំនួន ២០ រួមមានប្រទេសអូស្ត្រាលី ចិន និងឥណ្ឌានៅខែតុលា។
នៅក្រោមគោលនយោបាយ អន្តោប្រវេសន៍បច្ចុប្បន្ន វៀតណាម ផ្តល់ទិដ្ឋាការ ទេសចរណ៍រយៈពេលបីខែ សម្រាប់ពលរដ្ឋមក ពីគ្រប់ប្រទេស និងដែនដី។
រដ្ឋាភិបាលក៏បានបង្កើនចំនួនបីដង នៃការស្នាក់នៅក្នុងប្រទេស វៀតណាមដល់ ៤៥ ថ្ងៃសម្រាប់ពលរដ្ឋ មកពី ១៣ ប្រទេសដែលត្រូវបានលើកលែង ជាឯកតោភាគីពីទិដ្ឋាការ ចាប់ពីខែសីហាឆ្នាំមុន។
សូមជម្រាបថា វៀតណាមទទួលបាន ភ្ញៀវអន្តរជាតិចំនួន ៨,៨ លាននាក់នៅក្នុងឆមាសទីមួយនៃឆ្នាំនេះ កើនឡើង ៥៨% ពីមួយឆ្នាំទៅមួយឆ្នាំ និង ៤% ពីកម្រិតមុនកូវីដ ដោយជនជាតិកូរ៉េខាងត្បូង និងចិន ឈរនៅកំពូលតារាង៕
