បរទេស៖ ប៉ូលីសហុងកុងម្នាក់ បានស្លាប់បន្ទាប់ពីធ្លាក់ពីលើឡានតាក់ស៊ី Songthaew នៅទីក្រុង ប៉ាតាយ៉ា ប្រទេសថៃ កាលពីព្រឹកថ្ងៃចន្ទ ។
យោងតាមសារព័ត៌មាន ថៃ Bangkok Post ចេញផ្សាយនៅថ្ងៃទី២៣ ខែកក្កដា ឆ្នាំ២០២៤ បានឱ្យដឹងថា យោងតាមវីដេអូ ដែលទទួលបានដោយប្រព័ន្ធផ្សព្វផ្សាយ ក្នុងស្រុក បានឲ្យដឹងថា បុរសនោះ ត្រូវបានគេឃើញ ដួលពីខាងក្រោយ រថយន្តតាក់ស៊ី លើផ្លូវនៅម៉ោង ៨ និង៣៦នាទីព្រឹក។
យោងតាមប្រព័ន្ធផ្សព្វផ្សាយ ក្នុងស្រុកបានឱ្យដឹងទៀតថា បុរសនោះមានអាយុ ៤៨ ឆ្នាំ និងមកពីហុងកុង បានរងរបួសយ៉ាង ធ្ងន់ធ្ងរ ហើយត្រូវបានបញ្ជូន ទៅកាន់មន្ទីរពេទ្យក្បែរនោះ ដែលជាកន្លែងដែលគាត់ ត្រូវបានគេបញ្ជាក់ថា បានស្លាប់។ ប្រភពមួយប្រាប់កាសែត Post ថា បុរសនោះជាមន្ត្រីប៉ូលិស។
ក្រោយពេលកើតហេតុ សាក្សីឃើញហេតុការណ៍បានស្រែក ហៅរថយន្តតាក់ស៊ី នោះ ឲ្យឈប់ ប៉ុន្តែអ្នកបើកបរមិនព្រម ហើយបើករថយន្តគេចខ្លួនបាត់ស្រមោល។ ក្រោយមកប៉ូលិស ទទួលបានស្លាកលេខ រថយន្តលម្អិតតាមរយៈកាមេរ៉ាសុវត្ថិភាព ហើយបានបើកការតាមប្រមាញ់ភ្លាមៗ។
ក្រោយកើតហេតុ អ្នកបើកបររថយន្ត បានប្រគល់ខ្លួនឲ្យកម្លាំងសមត្ថកិច្ច ដោយអះអាងថា ខ្លួនមិនបានដឹងថា មាននរណាម្នាក់ធ្លាក់ពីលើរថយន្តនោះទេ ហើយគ្រាន់តែទាក់ទងទៅសមត្ថកិច្ច បន្ទាប់ពីទទួលបានដំណឹងពីម្ចាស់រថយន្ត។
ប្រភពបាននិយាយថា ពលបាលមកពីហុងកុងរូបនេះ គឺបានមកសម្រាកលំហែកាយ ជាមួយក្រុមគ្រួសារ ហើយគ្រោងនឹងត្រឡប់ទៅទីក្រុងវិញនៅថ្ងៃអង្គារ។ គាត់បានចាកចេញ ពីសណ្ឋាគារតែម្នាក់ ឯងមុនពេលធ្វើដំណើរ។
នាយកដ្ឋានអន្តោប្រវេសន៍ របស់ហុងកុង កាលពីល្ងាចថ្ងៃចន្ទ បាននិយាយថា ខ្លួនត្រូវបានជូនដំណឹង អំពីឧបទ្ទវហេតុនេះ ដោយក្រុមគ្រួសាររបស់បុរសនោះ ។ ខ្លួនបានទាក់ទងទៅការិយាល័យ ក្រសួងការបរទេស របស់ទីក្រុងប៉េកាំងនៅហុងកុង និងស្ថានទូតចិនប្រចាំប្រទេសថៃ ដើម្បីស្វែងយល់ពីស្ថានភាពនេះ ៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)