បរទេស៖ អ្នកនាំពាក្យក្រសួងការពារជាតិចិន លោក Zhang Xiaogang បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា បណ្តាប្រទេសសមាជិករបស់អង្គការណាតូ កំពុងទទួលបានផលចំណេញពីជម្លោះនៅអ៊ុយក្រែន។
យោងតាមសារព័ត៌មាន RT ចេញផ្សាយនៅថ្ងៃទី២៥ ខែកក្កដា ឆ្នាំ២០២៤ បានឱ្យដឹងថា លោក Zhang ត្រូវបានស្នើឱ្យធ្វើអត្ថាធិប្បាយ លើសេចក្តីប្រកាសដែលបានអនុម័ត កាលពីដើមខែនេះ នៅឯកិច្ចប្រជុំកំពូល របស់អង្គការណាតូក្នុង ទីក្រុងវ៉ាស៊ីនតោនឌីស៊ី ដែលបានដាក់ស្លាកទីក្រុងប៉េកាំងថា ជា “អ្នកសម្រេចនូវសង្គ្រាម របស់រុស្ស៊ីប្រឆាំងនឹងអ៊ុយក្រែន” ។ យ៉ាងណាក៏ដោយ លោកបានច្រានចោលឯកសារនេះ ហើយថា ជា «ពោរពេញទៅដោយការភូតភរ និងលម្អៀង»។
លោក Zhang បាននិយាយថា “សម្ព័ន្ធមិត្តណាតូដឹកនាំដោយសហរដ្ឋអាមេរិក បន្តដុតភ្លើង និងចំណេញពីសង្គ្រាមនេះ។ ណាតូត្រូវគិតពិចារណាខ្លួនឯង ជាជាងទម្លាក់កំហុសមកលើចិន» លោកក៏បានបន្តចោទសម្ព័ន្ធលោកខាងលិចថា បានបង្កជម្លោះជុំវិញពិភពលោក។
លោក Zhang បាននិយាយថា “ពីអ៊ុយក្រែន ដល់អាហ្វហ្គានីស្ថាន ពីអ៊ីរ៉ាក់ ដល់លីប៊ី វាបាននាំមកនូវសង្គ្រាម និងគ្រោះ មហន្តរាយ ដល់តំបន់ទាំងនេះ និងប្រជាជនរបស់ពួកគេ” ដោយបញ្ជាក់ជាថ្មីថា ទីក្រុងប៉េកាំង “ជំរុញយ៉ាងសកម្មនូវ កិច្ចចរចាសន្តិភាព” រវាងទីក្រុងម៉ូស្គូ និងគៀវ។
ទីក្រុងប៉េកាំងបានច្រាន ចោលម្តងហើយម្តងទៀត នូវការចោទប្រកាន់ថា ខ្លួនបានជួយទីក្រុងម៉ូស្គូ ឱ្យជៀសផុតពីការ ដាក់ទណ្ឌកម្ម និងការជំរុញ “មូលដ្ឋានឧស្សាហកម្មការពារជាតិរបស់រុស្ស៊ី” ។ នៅក្នុងខែកុម្ភៈ ឆ្នាំ ២០២៣ ប្រទេសចិន បានស្នើផែនទី បង្ហាញផ្លូវទៅកាន់សន្តិភាព ចំនួន ១២ចំណុច ហើយចាប់តាំងពីពេលនោះ មកបានខិតខំ ប្រឹងប្រែង ដើម្បីសម្របសម្រួលជម្លោះ ក្នុងអំឡុងពេលកិច្ចប្រជុំជាបន្តបន្ទាប់ ជាមួយមន្ត្រីរុស្ស៊ី និងអ៊ុយក្រែន៕
ប្រែសម្រួលៈ ណៃ តុលា
