បរទេស៖ ស្តេចគ្រឿងញៀនម៉ិកស៊ិក Ismael “El Mayo” Zambada និងកូនប្រុសអតីតដៃគូរបស់គាត់ឈ្មោះ Joaquin “El Chapo” Guzman ត្រូវបានចាប់ខ្លួន នៅថ្ងៃព្រហស្បតិ៍នៅទីក្រុង El Paso រដ្ឋតិចសាស់ ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២៦ ខែកក្កដា ឆ្នាំ២០២៤ បានឱ្យដឹងថា Zambada គឺជាអ្នកជួញដូរដ៏ធំបំផុត នៅក្នុងប្រវត្តិសាស្រ្ត របស់ប្រទេសម៉ិកស៊ិក ហើយក៏ជាសហស្ថានិករបស់ក្រុម Sinaloa Cartel ជាមួយ El Chapo ដែលត្រូវបានធ្វើបត្យាប័នទៅ សហរដ្ឋអាមេរិកក្នុងឆ្នាំ ២០១៧ ហើយកំពុងជាប់គុកមួយជីវិត នៅក្នុងពន្ធនាគារសន្តិសុខ ក្នុងទោសកម្រិតអតិបរមា។
ទាំង Zambada និង Joaquin Guzman Lopez ដែលជាកូន ប្រុសរបស់ El Chapo ប្រឈមមុខនឹងការចោទ ប្រកាន់ជាច្រើននៅសហរដ្ឋអាមេរិក សម្រាប់ការចែកចាយគ្រឿងញៀន ក្នុងបរិមាណដ៏ច្រើន ទៅកាន់ដងផ្លូវ របស់សហរដ្ឋអាមេរិក រួមទាំងថ្នាំ fentanyl ដែលបានកើនឡើងក្លាយ ជាមូលហេតុចម្បងនៃការស្លាប់ សម្រាប់ជនជាតិអាមេរិក ដែលមានអាយុចន្លោះពី ១៨ ឆ្នាំទៅ ៤៥ឆ្នាំ។
មន្ត្រីអាមេរិកពីរនាក់បានប្រាប់រ៉យទ័រថា Zambada ដែលត្រូវបានគេជឿថា មានអាយុ ៧០ឆ្នាំ និង Guzman Lopez ដែលមានអាយុ ៣០ ឆ្នាំត្រូវបានឃុំខ្លួន បន្ទាប់ពីបានចុះចតក្នុងយន្តហោះឯកជន ក្នុងតំបន់ El Paso ។
Guzman Lopez គឺជាកូនប្រុសម្នាក់ ក្នុងចំណោមកូនប្រុសទាំងបួនរបស់ El Chapo ដែលត្រូវបានគេស្គាល់ថា Los Chapitos ឬ Little Chapos ដែលបានទទួលមរតកពីក្រុម Sinaloa Cartel របស់ឪពុកពួកគេ។ បងប្រុសរបស់គាត់ឈ្មោះ Ovidio Guzman ត្រូវបានចាប់ខ្លួនកាលពីឆ្នាំមុន ហើយបានធ្វើបត្យាប័នទៅសហរដ្ឋអាមេរិក។
ក្នុងប៉ុន្មានឆ្នាំថ្មីៗនេះ ក្រុមគ្រឿងញៀន Sinaloa Cartel បានក្លាយជាគោលដៅដ៏ធំបំផុត សម្រាប់អាជ្ញាធរសហរដ្ឋអាមេរិក ដែលបានចោទប្រកាន់ក្រុមឧក្រិដ្ឋកម្មថា ជាអ្នកផ្គត់ផ្គង់ដ៏ធំបំផុតនៃថ្នាំញៀន fentanyl ដល់សហរដ្ឋអាមេរិក៕
ប្រែសម្រួលៈ ណៃ តុលា
