វ៉ាស៊ីនតោន ៖ ប្រទេសជប៉ុន និងសហរដ្ឋអាមេរិក បានព្រមព្រៀងគ្នា ដើម្បីធ្វើឱ្យប្រសើរឡើង នូវមុខងារបញ្ជារបស់កងកម្លាំង សហរដ្ឋអាមេរិកនៅក្នុង ប្រទេសជប៉ុន សម្រាប់ការសម្របសម្រួល កាន់តែប្រសើរឡើងនៃសម្ព័ន្ធភាពទ្វេភាគីរបស់ពួកគេ ចំពេលមានការអះអាង របស់ប្រទេសចិននៅក្នុងតំបន់ និងការគំរាមកំហែងនុយក្លេអ៊ែររបស់កូរ៉េខាងជើង ខណៈពេលដែលបន្តការពង្រីកការផលិតមីស៊ីលការពារដែនអាកាស។
រដ្ឋមន្ត្រីការបរទេស និង ការពារជាតិនៃប្រទេសទាំងពីរក៏បានប្ដេជ្ញាថា នឹងរិះរកមធ្យោបាយ ដើម្បីពង្រឹងអ្វីដែលហៅថាការរារាំងបន្ថែម ដែលរួមមានការការពារ នុយក្លេអ៊ែររបស់សហរដ្ឋអាមេរិក ដែលផ្តល់ដល់ប្រទេសជប៉ុន នៅក្នុងកិច្ចពិភាក្សាថ្នាក់រដ្ឋមន្ត្រីលើកដំបូងរបស់ពួកគេ ស្តីពីបញ្ហាដែលធ្វើឡើងបន្ទាប់ពីកិច្ចពិភាក្សាសន្តិសុខ “ពីរបូកពីរ នៅទីក្រុងតូក្យូ។
នៅដើមដំបូងនៃកិច្ចប្រជុំសន្តិសុខ រដ្ឋមន្ត្រីការបរទេសជប៉ុនលោកស្រី Yoko Kamikawa បានឲ្យដឹងថា ប្រទេសទាំងពីរ “ត្រូវតែពង្រឹងសម្ព័ន្ធភាពជាប់លាប់ និងបង្កើនការរារាំង” ដើម្បីការពារសណ្តាប់ធ្នាប់អន្តរជាតិ ដែលមានស្រាប់។
រដ្ឋមន្ត្រីការពារជាតិអាមេរិក លោក Lloyd Austin បានឲ្យដឹងថា ការផ្លាស់ប្តូរ ដើម្បីធ្វើទំនើបកម្មរចនាសម្ព័ន្ធបញ្ជា និងការគ្រប់គ្រងរបស់ពួកគេ គឺជា “ការវិវត្តដ៏សំខាន់បំផុតមួយនៅក្នុងប្រវត្តិសាស្ត្រនៃសម្ព័ន្ធភាពរបស់យើង” ។
កិច្ចចរចាពីរបូកពីរ ដែលចូលរួមដោយរដ្ឋមន្ត្រីការពារជាតិជប៉ុន លោក Minoru Kihara និងរដ្ឋមន្ត្រីការបរទេសអាមេរិក លោក Antony Blinken គឺជាជំនួបលើកដំបូងចាប់តាំងពីខែមករា ឆ្នាំ២០២៣ និងបង្ហាញពីទំនាក់ទំនងជិតស្និទ្ធរវាងសម្ព័ន្ធមិត្តទាំងពីរ បន្ទាប់ពីប្រធានាធិបតីអាមេរិកលោក ចូ បៃដិន ដកខ្លួនចេញពីការប្រជែងតំណែងប្រធានាធិបតីនៅក្នុងខែវិច្ឆិកា។
នៅក្នុងសេចក្តីថ្លែងការណ៍មួយ ដែលបានចេញផ្សាយបន្ទាប់ពីកិច្ចប្រជុំ រដ្ឋមន្ត្រីទាំង៤ បានព្រមានថាទីក្រុងប៉េកាំង “ស្វែងរកការរៀបចំឡើងវិញ នូវសណ្តាប់ធ្នាប់អន្តរជាតិ ដើម្បីផលប្រយោជន៍ ផ្ទាល់ខ្លួនដោយចំណាយប្រាក់អ្នកដទៃ និងបានហៅអាកប្បកិរិយាបង្ខិតបង្ខំ របស់ខ្លួនថាជាការព្រួយបារម្ភយ៉ាងធ្ងន់ធ្ងរ ចំពោះសម្ព័ន្ធភាព”៕
ប្រែសម្រួល ឈូក បូរ៉ា
