បរទេស ៖ តុលាការធម្មនុញ្ញរបស់ប្រទេសថៃ នៅថ្ងៃពុធនេះ បានរំសាយគណបក្សឆ្ពោះទៅមុខ ដែលត្រូវបានគេរកឃើញថា មានពិរុទ្ធពីបទបង្កគ្រោះថ្នាក់ ដល់របបរាជានិយម អាស្រ័យរដ្ឋធម្មនុញ្ញ និងសន្តិសុខជាតិ ហើយបានហាមឃាត់ នាយកប្រតិបត្តិរបស់បក្សនេះ រយៈពេលដប់ឆ្នាំថែមទៀត។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៧ ខែសីហា ឆ្នាំ២០២៤ បានឱ្យដឹងថា ដោយប្រកាសសាលក្រម របស់ខ្លួននៅម៉ោង ៣ រសៀល តុលាការបាននិយាយថា គណបក្សចលនាឆ្ពោះទៅមុខ បានបង្ហាញពីការគំរាមកំហែង ដល់របបរាជានិយមអាស្រ័យរដ្ឋធម្មនុញ្ញ និងសន្តិសុខជាតិ តាមរយៈការធ្វើយុទ្ធនាការជាបន្តបន្ទាប់ និងធ្ងន់ធ្ងរ សម្រាប់ការធ្វើវិសោធនកម្មមាត្រា 112 នៃក្រមព្រហ្មទណ្ឌ (ច្បាប់ប្រមាថព្រះមហាក្សត្រ)។
តុលាការបាននិយាយថា យុទ្ធនាការរួមមានសំណើ របស់បក្ស MFP ដើម្បីធ្វើវិសោធនកម្មច្បាប់នៅថ្ងៃទី ២៥ ខែមីនា ឆ្នាំ ២០២១, យុទ្ធនាការបោះឆ្នោត មុនថ្ងៃទី១៤ ខែឧសភា ឆ្នាំ២០២៣ និងការបង្ហាញពីចេតនាធ្វើវិសោធនកម្មតាមរយៈសកម្មភាពនយោបាយជាច្រើន និងបណ្តាញផ្សេងៗ។
យោងតាមតុលាការ គឺ ការប៉ុនប៉ងធ្វើឱ្យខូចតម្លៃស្ថាប័ន ព្រះមហាក្សត្រ បង្ហាញពីចេតនារំលោភលើស្ថាប័នព្រះមហាក្សត្រ ដើម្បីផលប្រយោជន៍ នយោបាយរបស់គណបក្ស ក្នុងការបោះឆ្នោតសកល ប៉ះពាល់ដល់ជំនឿ របស់ប្រជាពលរដ្ឋ ចំពោះស្ថាប័ន និងប៉ះពាល់ដល់សន្តិសុខជាតិ។
តុលាការបាននិយាយថា “ការបញ្ចេញមតិចំពោះវិសោធនកម្មច្បាប់ និងយុទ្ធនាការបោះឆ្នោតបានគំរាមកំហែងយ៉ាងធ្ងន់ធ្ងរដល់សន្តិសុខជាតិ”។
ក្រៅពីការរំលាយគណបក្ស តុលាការក៏បានហាមប្រាម នាយកប្រតិបត្តិ MFP ដែលកាន់តំណែងរបស់ពួកគេចន្លោះថ្ងៃទី 25 ខែមីនា ឆ្នាំ 2021 និងថ្ងៃទី 31 ខែមករា ឆ្នាំនេះ ពីការឈរឈ្មោះបោះឆ្នោត បង្កើតគណបក្ស នយោបាយថ្មី ឬចូលរួមក្នុងការបង្កើតគណបក្សថ្មីរយៈពេលដប់ឆ្នាំបន្ទាប់ពី សេចក្តីសម្រេចរំលាយចោល ។
ប្រែសម្រួលៈ ណៃ តុលា
