បរទេស៖ វិស័យកសិកម្មរបស់ប្រទេសចិនត្រូវតែពង្រឹងសមត្ថភាពរបស់ខ្លួនសម្រាប់ការបង្ការ និងកាត់បន្ថយគ្រោះមហន្តរាយ។ យោងតាមទីភ្នាក់ងារសារព័ត៌មានចិន ស៊ិនហួ បានឱ្យដឹងថា ឧបនាយករដ្ឋមន្ត្រីចិន លោក Liu Guozhong បាននិយាយនៅថ្ងៃអង្គារដោយបានប្តេជ្ញាគាំទ្រផ្នែកហិរញ្ញវត្ថុបន្ថែមទៀតដើម្បីស្តារទិន្នផលឡើងវិញបន្ទាប់ពីទឹកជំនន់។
យោងតាមសារព័ត៌មាន VOA ចេញផ្សាយនៅថ្ងៃទី១៣ ខែសីហា ឆ្នាំ២០២៤ បានឱ្យដឹងថា លោក Liu បានអំពាវនាវឱ្យពង្រឹងការត្រួតពិនិត្យស្ថានភាពទឹកភ្លៀង ដើម្បីផ្តល់ការព្រមានជាមុន និងបង្កើនសមត្ថភាពការពារប្រឆាំងនឹងគ្រោះមហន្តរាយទឹក និងគ្រោះរាំងស្ងួតនៅក្នុងគម្រោងអភិរក្សទឹកសំខាន់ៗនៅក្នុងខេត្តភាគឦសានរបស់ប្រទេសចិន។
ស៊ិនហួបានផ្សាយថា ការអត្ថាធិប្បាយរបស់លោក Liu បានធ្វើឡើង ខណៈដែលលោកធ្វើដំណើរស៊ើបអង្កេតនៅក្នុងខេត្ត Liaoning និង Jilin នៅភាគឦសានប្រទេសចិន។
ទន្លេចំនួនប្រាំបីនៅក្នុងខេត្ត Liaoning, Jilin, Heilongjiang និងតំបន់នៃម៉ុងហ្គោលីខាងក្នុង និង Xinjiang រួមជាមួយនឹងតំបន់ផ្សេងទៀតបានជួបប្រទះទឹកជំនន់លើសពីកម្រិតប្រកាសអាសន្នកាលពីថ្ងៃទី១៣ ខែសីហា, នេះតាមទូរទស្សន៍រដ្ឋ CCTV បានរាយការណ៍ដោយដកស្រង់សម្តីក្រសួងធនធានទឹករបស់ប្រទេសចិន។
ភ្លៀងធ្លាក់ខ្លាំងក្នុងខែកក្កដា បានហក់មកលើតំបន់ដ៏ធំដូចជាអាង Sichuan ទន្លេលឿង ទន្លេ Huai និងផ្នែកខ្លះនៃវាលទំនាបប្រទេសចិនខាងជើង ដោយបំបែកកំណត់ត្រាទឹកភ្លៀងនៅស្ថានីយ៍អាកាសធាតុចំនួន ៣៣ ក្នុងខេត្ត Henan, Hunan និង Shandong។
រដ្ឋាភិបាលបាននិយាយកាលពីថ្ងៃទី ៩ខែសីហាថា ភ្លៀងធ្លាក់ខ្លាំង និងទឹកជំនន់ជាបន្តបន្ទាប់នាំឱ្យមានការខាតបង់សេដ្ឋកិច្ចជិតទ្វេដងពីគ្រោះធម្មជាតិនៅក្នុងខែកក្កដាធៀបនឹងឆ្នាំមុន។
ប្រទេសចិនបានទទួលរងការខាតបង់សេដ្ឋកិច្ចចំនួន ១០,១ ពាន់លានដុល្លារពីគ្រោះមហន្តរាយធម្មជាតិកាលពីខែមុន ជាមួយនឹង ៨៨ភាគរយនៃការខាតបង់ទាំងនោះដែលបណ្តាលមកពីភ្លៀងធ្លាក់ខ្លាំង និងទឹកជំនន់។ នេះបើយោងតាមក្រសួងគ្រប់គ្រងគ្រាអាសន្ន។ ទិន្នន័យរបស់ក្រសួងបានបង្ហាញថា វាគឺជាចំនួននៃការខាតបង់ដ៏ធំបំផុតសម្រាប់ខែកក្កដា ចាប់តាំងពីឆ្នាំ២០២១មក។
គ្រោះធម្មជាតិក្នុងអំឡុងខែនេះ បានប៉ះពាល់ដល់មនុស្សជិត ២៦,៤លាននាក់ នៅទូទាំងប្រទេសចិន ដោយមាន ៣២៨ នាក់ស្លាប់ ឬបាត់ខ្លួន។ មនុស្សជាងមួយលាននាក់ត្រូវបានផ្លាស់ប្តូរទីលំនៅ ផ្ទះចំនួន ១២.០០០ខ្នង បានដួលរលំ និង ១៥៧.០០០ខ្នង ទៀតរងការខូចខាត, ផ្ទៃដីដំណាំប្រមាណ ២,៤២ លានហិកតាក៏រងផលប៉ះពាល់ដែរ៕
ប្រែសម្រួលៈ ណៃ តុលា
