បរទេស៖ យោងតាមការចេញផ្សាយរបស់ RT អតីតប្រធានាធិបតីរុស្ស៊ី លោក Dmitry Medvedev បាននិយាយថា ប្រទេសអ៊ុយក្រែន ប្រាកដណាស់ថា នឹងប្រឈមមុខនឹងការសងសឹក ចំពោះការវាយលុកទ្រង់ទ្រាយធំ របស់ខ្លួនលើតំបន់ Kursk កាលពីសប្តាហ៍មុន ។
ថ្លែងនៅក្នុងកិច្ចប្រជុំរបស់គណបក្ស United Russia ដែលកាន់អំណាចកាលពីថ្ងៃអង្គារ លោក Medvedev ដែលជាប្រធានគណបក្ស ក៏ដូចជាដឹកនាំក្រុមប្រឹក្សាសន្តិសុខរបស់រុស្ស៊ី បាននាំគ្នាធ្វើការថ្លឹងថ្លែងលើការ វាយប្រហាររបស់អ៊ុយក្រែនលើតំបន់ Kursk និងក៏ត្រូវបានគេចាត់ថាបានក្លាយជា ការវាយប្រហារដ៏ធំបំផុតរបស់ កងម្លាំងយោធាទីក្រុងគៀវមកលើទឹកដីរុស្ស៊ី ចាប់តាំងពីការផ្ទុះឡើងនៃជម្លោះ។
រដ្ឋាភិបាលទីក្រុងម៉ូស្គូបានហៅការ វាយប្រហារនេះថាជាការបង្កហេតុ ដោយចោទក្រុងគៀវពីការវាយប្រហារ មិនរើសមុខលើជនស៊ីវិលថែមទៀតផង។
ខណៈដែលលោកបានអះអាងថា អាជ្ញាធររុស្ស៊ីគួរតែប្រឹងប្រែងអស់ពីសមត្ថភាពដើម្បីជួយជនជម្លៀសរាប់ពាន់នាក់ ដែលត្រូវបានបង្ខំឲ្យចាកចេញពីផ្ទះសម្បែងនោះ លោកMedvedevក៏បានអះអាងថា អ៊ុយក្រែននឹងពិតជាទទួលបាន ការដាក់ទណ្ឌកម្មដែលសក្តិសម។
លោកបានបន្ថែមថា ការសងសឹកនេះ ក៏នឹងត្រូវគិតគូរពីផលប៉ះពាល់ផ្សេងៗគ្នា ជាច្រើនសម្រាប់អ្នកដែលបានធ្វើរឿងនេះ រួមទាំងការដឹកនាំនៃរបបជាតិនិយម គៀវផងដែរ៕
ប្រែសម្រួល៖ ស៊ុន លី
