ប៉េកាំង៖ អ្នកនាំពាក្យក្រសួងការបរទេសចិន បានឲ្យដឹងថា ប្រទេសចិន បានជំរុញប្រទេសហ្វីលីពីន ឱ្យបញ្ឈប់សកម្មភាពរំលោភបំពាន និងការញុះញង់នៅក្នុងដែនសមុទ្រ Huangyan Dao ។
អ្នកនាំពាក្យចិន Lin Jian ក៏បានឲ្យដឹងផងដែរថា ប្រទេសចិន នឹងបន្តធ្វើសកម្មភាពយ៉ាងម៉ឺងម៉ាត់ស្របតាមច្បាប់ ដើម្បីការពារយ៉ាងម៉ឺងម៉ាត់ នូវអធិបតេយ្យភាពទឹកដី និងសិទ្ធិ និងផលប្រយោជន៍ដែនសមុទ្ររបស់ខ្លួន។
លោកបានធ្វើការកត់សម្គាល់ នៅពេលត្រូវបានស្នើសុំឱ្យធ្វើអត្ថាធិប្បាយ ពីប្រធានាធិបតីហ្វីលីពីនលោក Ferdinand Romualdez Marcos និងជាប្រធានអគ្គសេនាធិការ នៃកងកម្លាំងប្រដាប់អាវុធហ្វីលីពីនលោក Romeo Brawner នាពេលថ្មីៗនេះដែលទាក់ទងនឹងតំបន់ Huangyan Dao របស់ប្រទេសចិន។
លោកបានចង្អុលបង្ហាញថាតំបន់ដែនសមុទ្រ Huangyan Dao តែងតែជាទឹកដីរបស់ប្រទេសចិន ហើយប្រទេសចិន មានអធិបតេយ្យភាពដែល មិនអាចប្រកែកបានលើដែនទឹក Huangyan Dao និងដែនអាកាស និងដែនទឹក ដែលនៅជាប់គ្នា។
លោកបានលើកឡើងថា យន្តហោះយោធាហ្វីលីពីនពីរដង បានចូលលុកចូល ដែនអាកាសជិតខាង Huangyan Dao កាលពីថ្ងៃទី០៧ និង០៨ ខែសីហា ដែលបានរំលោភយ៉ាងធ្ងន់ធ្ងរ លើអធិបតេយ្យភាពរបស់ប្រទេសចិន និងរំលោភលើច្បាប់អន្តរជាតិ និងបទដ្ឋានជាមូលដ្ឋាន នៃទំនាក់ទំនងអន្តរជាតិ។
លោកបានបន្ដថា យោធាចិនបានចាត់វិធានការចាំបាច់ និងស្របច្បាប់ក្នុងការឆ្លើយតប ហើយសមយុទ្ធរបស់ពួកគេ នៅកន្លែងកើតហេតុមានលក្ខណៈវិជ្ជាជីវៈ និងស្របតាមច្បាប់របស់ចិន និងច្បាប់អន្តរជាតិ៕
ប្រែសម្រួល ឈូក បូរ៉ា
